Հինգշաբթի 3 Հոկտեմբեր 2019ին, Էջմիածնայ Մայր Աթոռ այցելեց Թէքէեան Մշակութային Միութեան Հիմնադիրներու Մարմնի վարչութեան ատենապետ ընկ. Յակոբ Գասարճեան ընկերակցութեամբ իր կողակիցին՝ Տիկ. Անիին:
ՆՍՕՏՏ Գարեգին Բ. Ամենայն Հայոց Վեհափառ հայրապետը իր հիւրերը ընդունեց Մայր Աթոռի վերանորոգուած վեհարանին մէջ:
Տէր եւ Տիկ. Գասարճեաններ նախ շնորհաւորեցին վեհափառ Հայրապետը Վեհարանի գեղատիպ վերանորոգման եւ բարեզարդման համար:
Ապա խօսակցութիւնը ընդացաւ հայ ժողովուրդն ու հայրենիքը յուզող շատ մը թեմաներու շուրջ: Գարեգին Բ. Կաթողիկոսը վեր առաւ Թէքէեան Մշակութային Միութեան յատուկ առաքելու թիւը ազգապահպանման եւ Հայ մշակոյթի տարածման վեհ գործին մէջ: Վեհափառ Հայրապետը հետաքրքրուեցաւ Լիբանանի ապահովական եւ տնտեսական կացութեամբ յատուկ մտահոգութիւն ցուցաբերելով լիբանանահայութեան մասին: Ընկ. Գասարճեան Լիբանանի եւ լիբանանահայութեան այսօրուայ իրավիճակին մասին կարեւոր զեկոյց մը տուաւ Վեհափառ տիրոջ:
Վեհափառին համար շատ մեծ մտահոգութիւն էր սփիւռքի հայկական վարժարաններուն իրավիճակը: Ան շեշտեց, որ Հայ վարժարանը եկեղեցիին կողքին հայապահպանման ամրոց է, որուն տկարացումը՝ տկարացումն է նաեւ Հայ եկեղեցիին: Անդրադառնալով այս նիւթին, ընկեր Գասարճեան բուռն կերպով պաշտպանեց հայ դպրոցի գոյութեան գաղափարը, հաստատելով որ իր գլխաւորած մարմինը ամէն զոհողութեամբ պիտի պահէ ու աւելի եւս զարգացնէ իրեն աւանդ ձգուած Պէյրութի Վահան Թէքէեան Վարժարանը
Աւարտին, Վեհափառ Հայրապետը այս առիթով կոչ ըրաւ բոլոր պատասխանատուներուն չփակելու ոչ մէկ վարժարան այլ նուիրուելու անոր առողջ տնօրինման աշխատանքին, յօգուտ Հայ մանուկներուն հայեցի դաստիարակութեան:
