ՄՏՔԻ ՇԻԹԵՐ

ՆՈՐ ՕՐ, ԼՈՍ ԱՆՃԵԼԸՍ.-

. Անկեղծ ժպիտը առանց փուշի վարդ է, իսկ կեղծ ժպիտը առանց վարդի փուշ։ 

. Իմաստուն մարդը ան է, որ չ՚ըսեր ինչ որ գիտէ, այլ գիտէ՝ ինչ որ կ՚ըսէ։

. Սեղանիդ վրայ միշտ ձուկ կը գտնես, երբ կամքի թելով ուռկանդ հիւսես։

. Ճշմարտութիւնը կը դառնայ խայթոց, երբ փորձես իր դէմ աչքերդ պահել գոց։

. Համբաւով կրնաս շահիլ ոսկի թագ, իսկ Նկարագրով՝ պատիւ ու յարգանք։

. Երբ խօսակիցդ յիմար-յամառ է, խօսակցութեան թելն իսկոյն մկրատ է։

. Դիմակներ կան երեսի պէտք չունին, երեսներ ալ կան դիմակի պէտք չունին։

. Կեղծաւոր մարդը լուսնի նման է, դէմքի մէկ մասը միշտ մութ կը պահէ։

. Ան որ պատուաւոր մարդու վրայ ցեխ շպրտէ, լոկ իր ձեռքի հինգ մատերն կ՚աղտոտէ։

. Բարեկամի միջոցաւ կրնաս շահիլ նիւթ ու դրամ, բայց դրամով՝ չես  կրնար երբեք շահիլ բարեկամ։

. Երբ ձախորդութեանդ համար ուրիշ մէկը մեղադրես, կը նշանակէ թէ դուն իսկապէս ձախողած մարդ ես։

. Մատնոց մը քաղցրանուշ ժպիտը աւելի բուժիչ դեր կը կատարէ, քան տակառ մը լեցուն լեղի դեղը։

. Անոնք որոնք քեզ կը նախանձին, կը նշանակէ թէ մեծ կարեւորութիւն կու տան քու անձին։

. Մոմը կը ցրուէ մութը սենեակին, իսկ գրքի էջերն խաւարը մտքին։

. Բաներ կան որ չես  կրնար ընել մինչեւ որ չսորվիս, բաներ ալ կան որ չես կրնար սորվիլ մինչեւ որ չընես։

. Իրատես մարդը կը լսէ իրական ձայնը, իսկ անտարբերը՝ լոկ արձագանգը։

. Դառնլու համար իսկական Իշխան, պէտք է նախ իշխես կիրքերուդ վրան։

. Կնոջ մը արցունքը, նախ իր սիրտը կը պարպէ, ապա՝ ամուսնոյն գրպանը։

. Լոկ ձեռք առնելով ասեղ ու դերձան, շատեր կը կարծեն թէ դարձան դերձակ։

. Եթէ ապրած տունդ ունի ցած տանիք, օր մը անպայման կ՚ունենաս կուզիկ։

. Ապերախտ մարդը կը նմանի խոզի մը, որ ամէն օր կը ճաշակէ խոզկաղին ու բնաւ շնորհակալ չ՚ըլլար խոզկաղին արտադրող ծառին։

. Սիրէ՛ ինչ որ պէտք է սիրես, ատէ՛ ինչ որ պէտք է ատես, բայց չըլլայ երբեք ատելով սիրես կամ ալ մէկը սիրելով ատես։

. Մեղուն փեթակ պէտք է շինէ, սարդը ոստայն պէտք է հիւսէ, իսկ բանաւոր մարդն իմաստուն՝ բարեկամ եւ բարի անուն։

ԵԶՆԻԿ ԲԱԼԱՅԵԱՆ

Սեպտեմբեր 2019