Հայաստանը, լինելով ՀԱՊԿ ու ԵԱՏՄ-ի անդամ ու հիմնվելով ինքնիշխանության սկզբունքի վրա, ելնելով ազգային շահից՝ աշխատում և խորապես համագործակցում է այս երկու կառույցներում: Ինչեպս հաղորդում է «Արմենպրես»-ը, այս մասին նշել է ՀՀ արտաքին գործերի նախարար Զոհրաբ Մնացականյանը՝ Ազգային ժողովում լրագրողների հետ ճեպազրույցում։
Լրագրողը հիշեցրել է ռուսական պարբերականներից մեկի հոդվածը՝ վերնագրված «Հայաստանը, ՀԱՊԿ-ի անդամ լինելով, ԵԱՏՄ անդամ լինելով՝ հիբրիդային պատերազմ է վարում Ռուսաստանի դեմ» ու հետքրքրվել, թե ինչ կարծիք ունի հոդվածի մասին արտաքին գերատեսչության ղեկավարը։ Ի պատասխան, Զոհրաբ Մնացականյանն ասել է.
«Ես, անկեղծ ասած, այդ հոդվածը չեմ տեսել, և Ձեր ասածից դատելով՝ կարծես թե ցանկություն էլ չեմ ունենալու տեսնելու: Հայաստանը շատ հետևողական է իր առջև դրած, իր որդեգրած քաղաքականության մեջ: Հայաստանը ՀԱՊԿ-ի անդամ է, Հայաստանը ԵԱՏՄ-ի անդամ է: Ե՛վ ՀԱՊԿ-ի, և՛ ԵԱՏՄ-ի անդամ լինելով, հիմնվելով ինքնիշխանության սկզբունքի վրա, ելնելով մեր ազգային շահից՝ մենք աշխատում և խորապես համագործակցում ենք այս երկու կառույցներում: Մենք ունենք համագործակցություն տարբեր այլ կառույցներում, և այսօր Խորհրդարանում նույնպես խոսվել է դրա մասին: Այո, մենք այն երկիրն ենք, որն ունի ԵԱՏՄ-ի անդամակցություն և ունի Համապարփակ և ընդլայնված գործընկերության պայմանագիր Եվրամիության հետ: Հայաստանը ՀԱՊԿ-ի անդամ է և միևնույն ժամանակ ռազմաքաղաքականության դաշտում համագործակցում է տարբեր այլ գործընկերների հետ: Ես այսօր էլ առիթ ունեցա ասելու, որ սա բխում է մեր ազգային շահերից, գերակայություններից, և մեր առջև դրված կարևորագույն նպատակը և նաև խնդիրն այդ ներգրավվածությունը, ներգրավվումները և համագործակցությունն ՝ այնպես ապահովելն է, , որպեսզի երբևէ չգանք մի իրավիճակի, երբ մեկ գործընկերոջ հետ հարաբերությունները կկառուցենք մյուսի հաշվին»:
