«ԶԱՐԹՕՆՔ», ՊԷՅՐՈՒԹ –Լիբանանի Վարչապետ Սաատ Հարիրի գովեց Լիբանան-Ռուսիա յարաբերութիւնները: Ան այս խօսքը ըսաւ երկու երկիրներուն միջեւ դիւանագիտական կապերու հաստատման 75 ամեակին առիթով: Այս բոլորը նշուեցան Հարիրիին ղրկած նամակին մէջ, որ ուղղուած էր Ռուսիոյ վարչապետ Տիմիթրի Մետվետեւին:
Հարիրի վեր առաւ Ռուսիոյ մշտական զօրակցութիւնը ի խնդիր Լիբանանի գերիշխանութեան նամանաւանդ անոր դիմակալած ամենադժուարին օրերուն երբ Իսրայէլի կողմէ Լիբանանի սահմանները կը խախտուէին 2006ի պատերազմին, որ աւարտեցաւ ՄԱԿի 1701 որոշումով, որուն մէջ կարեւոր դեր ունէր Ռուսիան:
Հարիրի նաեւ շնորհակալութիւն յայտնեց Ռուսիոյ Լիբանանեան բանակին իր տուած օգնութիւններուն համար: Յատուկ շնորհակալութիւն յայտնեց Հարիրի ռուսական այն նախաձեռնութեան համար, որ կը միտի սուրիացի պատսպարեալները իրենց երկիրը վերադարձնելու:
