ՆՈՐ ՕՐ, ԼՈՍ ԱՆՃԵԼԸՍ.-ԵՐԵՒԱՆ, 13 ՅՈՒԼԻՍԻ, ԱՐՄԷՆՓՐԷՍ: Եզրափակուեց Երևանի կարևորագոյն մշակութային միջոցառումներից մէկը` «Ոսկէ ծիրան» 16-րդ միջազգային կինոփառատօնը:
Փառատօնի մրցանակակիրների անունները յայտնի դարձան Յուլիսի 13-ին «Մոսկուա» կինոթատրոնում կայացած մրցանակաբաշխութեան և կինոփառատօնի փակման հանդիսաւոր արարողութեան ընթացքում:
«Արմէնփրէս»-ի հաղորդմամբ` ՀՀ վարչապետի (GAIFF Pro-ի կինոյի զարգացման հարթակ) մրցանակը յանձնուեց Տաթև Յակոբեանի «Թակարդը» կինոնկարին:
Լիամետրաժ ֆիլմերի միջազգային մրցոյթում «Ոսկէ ծիրան» մրցանակ ստացաւ Ռիչարդ Բիլինգհեմի «Ռէյ և Լիզ» կինոնկարը, «Արծաթէ ծիրան»-ը տրուեց Կանտեմիր Բալագովի «Լողլողը» ժապաւէնին: Ժիւրիի յատուկ յիշատակմանն արժանացաւ Հասան Ֆազիլիի «Կէսգիշերային ճամբորդը» կինոնկարը:
Մրցոյթի ժիւրիի նախագահ, ռեժիսոր, սցենարիստ, «Եղիցի լոյս» մրցանակի դափնեկիր Ալեքսանդր Մինդաձէն շնորհակալութիւն յայտնեց փառատօնի հիմնադիրներին` նշելով, որ «Ոսկէ ծիրան»-ը իրեն դուր է եկել ծրագրի բազմազանութեամբ, որակեալ ֆիլմերի առատութեամբ: Նրա խօսքով` որոշում կայացնելիս ոչ միշտ է համամիտ եղել ժիւրիի միւս անդամների հետ, բայց, ի վերջոյ, համատեղ որոշում են կայացրել:
Կարճամետրաժ ֆիլմերի տարածաշրջանային մրցոյթում «Ոսկէ ծիրան» մրցանակ ստացաւ Մարզիէ Ռիահիի «Վարորդական դասեր» ֆիլմը, «Արծաթէ ծիրան»-ը տրուեց Ռատի Ցիտելաձէի «Հասարակութեան գերին» ժապաւէնին:
Գենադի Մելքոնեանի անուան յատուկ մրցանակին արժանացաւ Լիլիթ Պետրոսեանի «Բայինան»:
Տարածաշրջանային համայնապատկեր մրցոյթում կինոքննադատների մրցանակը յանձնուեց Թինաթին Քաջրիշվիլիի «Հորիզոնը» ժապաւէնին:
Փակման արարողութեանը ներկայ էր ՀՀ կրթութեան, գիտութեան, մշակոյթի և սպորտի նախարար Արայիկ Յարութիւնեանը: ««Ոսկէ ծիրան»-ը իր իւրայատուկ տեղն ունի միջազգային կինոփառատօների շարքում: Պետութիւնը պէտք է անի հնարաւոր ամէնը փառատօնն առաւել զարգացնելու համար: Վստահ եմ, որ յաջորդ տարիները նոյնպէս յաջող ընթացք կ՚ունենան»,– նշեց նախարարն ու խոստովանեց, որ առաջին տարին է, որ չի հասցրել որևէ կինոնկար դիտել, սակայն հանդիպել է ժիւրիի անդամների հետ, որոնք արհեստավարժ են, գիտակ և, վստահաբար, ճիշդ որոշումներ են կայացրել յաղթող ֆիլմերն ընտրելիս:
«Ոսկէ ծիրան»-ի նախագահ Յարութիւն Խաչատրեանը շնորհակալութիւն յայտնեց երիտասարդներին փառատօնը պատուով անցկացնելու համար և յորդորեց յետագայում խուսափել բացթողումներից:
