«ԶԱՐԹՕՆՔ», ՊԷՅՐՈՒԹ –Թուրքիոյ կողմէ Կիպրոսի բացառիկ տնտեսական գօտիին մէջ իրականացուող հորատման աշխատանքները շարունակելու առնչութեամբ ԵՄ-ն հրապարակած է Թուրքիոյ դէմ իրականացուելիք պատժամիջոցներ:
Ինչպէս կը հաղորդէ «Արմէնփրես»՝ վկայակոչելով գերմանական «Deutsche Welle»-ն, պատժամիջոցներու որոշումը կայացուած է Պրիւքսէլի մէջ արտաքին յարաբերութիւններու խորհուրդի անդամներու կողմէ այն հիմնաւորումով, որ Թուրքիոյ կողմէ իրականացուող հորատման աշխատանքները կը հակասեն միջազգային իրաւունքի չափանիշներուն:
ԵՄ արտաքին գործերու նախարարներու նպատակն է պատժամիջոցներու միջոցով հասնիլ անոր, որ թրքական կողմը դադարեցնէ Կիպրոսի բացառիկ տնտեսական գօտիին մէջ իրականացուող հորատման աշխատանքները:
Որոշման մէջ նշուած է. «Ցաւալի է, որ հակառակ կատարուած բազմաթիւ կոչերուն, Թուրքիան շարունակեց հորատման աշխատանքները»:
Պատժամիջոցներով կը նախատեսուի հետեւեալը՝ Թուրքիան 2020 թուականին ԵՄ-էն ֆինանսական օժանդակութիւն պիտի ստանայ, սակայն պատժամիջոցներու արդիւնքով այդ օժանդակութիւնը կը նուազեցուի 146 միլիոն եւրոյով: Տնտեսական եւ առեւտրային յարաբերութիւններու վերաբերեալ քաղաքական երկխօսութիւնները պիտի չեղարկուին: Օդագնացութեան պայմանագրերու կնքման բանակցութիւնները պիտի ընդհատուին: Եւրոպական ներդրումային դրամատունէն Թուրքիային տրուելիք վարկային օժանդակութիւնը պիտի վերանայուի:
Որոշման մէջ նշուած է նաեւ, որ եթէ Թուրքիան, Կիպրոսի Հանրապետութեան ինքնիշխանութեան իրաւունքները խախտելով, հորատման աշխատանքները շարունակէ, ապա յաւելեալ պատժամիջոցներ պիտի կիրառուին:
