«ԶԱՐԹՕՆՔ», ՊԷՅՐՈՒԹ –Աշխատանքային այցով ԱՄՆ գտնուող Ազգային ժողովի նախագահ Արարատ Միրզոյեանը Յուլիս 15-ին «Atlantic Council» կեդրոնի մէջ հանդէս եկած է ելոյթով՝ նուիրուած Թաւշեայ յեղափոխութենէն ետք Հայաստանի մէջ տեղի ունեցած փոփոխութիւններուն եւ զարգացման հեռանկարներուն: Ինչպէս «Արմէնփրես»-ին տեղեկացուցին լրատուութեան եւ հանրութեան հետ կապերու վարչութենէն, ելոյթէն ետք ներկայ ԱՄՆ պետական եւ փորձագիտական շրջանակներու ներկայացուցիչներուն հետ եղած է շահագրգիռ քննարկում Հայաստանի արտաքին քաղաքականութեան, Հայաստանի մէջ սպասուող դատական համակարգի բարեփոխումներու, հայ-ամերիկեան երկկողմ օրակարգի զարգացման եւ այլ հարցերու շուրջ:
ԱՄՆ-ի Հայաստանի դեսպանատան մէջ Արարատ Միրզոյեանը ընդունած է Միջազգային հանրապետական հիմնարկի փոխնախագահ Սքոթ Մեսքիթը: Կողմերը քննարկած են Ազգային ժողովի կարողութիւններու զարգացման ուղղուած համատեղ ծրագրերու օրակարգը:
Օրուայ աւարտին Արարատ Միրզոյեանի գլխաւորած պատուիրակութիւնը հանդիպած է Ուաշինկթընի մէջ հայ համայնքի ներկայացուցիչներու հետ եւ մտքեր փոխանակած Հայաստանի մէջ տեղի ունեցող վերջին զարգացումներու եւ խորհրդարանի աշխատանքներու վերաբերեալ։
