«ԶԱՐԹՕՆՔ», ՊԷՅՐՈՒԹ – Ելեւմուտքի նախարար Ալի Հասան Խալիլ յայտարարեց, որ 2019-ի պետական պիւտճէի նախագիծին նուիրուած` «Ելեւմուտքի եւ Պիւտճէի յանձնաժողով»-ի, Երեքշաբթի օրուան նիստը պէտք է վերջինը ըլլայ:
Յանձնաժողովը, Յունիս 10-էն ի վեր, պարբերաբար կը հանդիպէր պիւտճէի քննարկման համար:
Երեքշաբթի օրուան նիստը կը նախագահէր յանձնաժողովի նախագահ Իպրահիմ Քանաան։ Ժամը 6:00-ին սկսած նիստին ներկայ էր պաշտպանութեան նախարար Էլիաս Պու Սաապ: Խալիլ եւ Քանաան Երկուշաբթի երկկողմ հանդիպում մը ունեցած էին պիւտճէի մասին չլուծուած շարք մը հարցերու շուրջ:
Նշենք, որ նախորդ նիստերուն ընթացքին յանձնաժողովը յետաձգած էր շարք մը հակասական իրողութիւններ, ինչպէս, ներմուծուող ապրանքներու մեծ մասի 2 տոկոս հարկի յաւելում եւ վեթերաններու վերջնական նպաստներու կրճատում:
Պիւտճէն կը ներառէ պետական ծախսերու կրճատումները եւ հարկերու աճը` նպատակ ունենալով խոչընդոտել պակասուրդը, որ անցեալ տարի կազմած էր համախառն ներքին արդիւնքի 11.1 տոկոսը:
