«ԶԱՐԹՕՆՔ», ՊԷՅՐՈՒԹ – Մեծ Բրիտանիան եւ Ֆրանսան համաձայնած են Սուրիա ուղարկել յաւելեալ զօրախումբեր այնտեղէն հեռացող ամերիկացի զինուորականներու փոխարէն: Ինչպէս կը հաղորդէ «Արմէնփրես», այս մասին կը տեղեկացնէ «ՌԻԱ Նովոսթի»-ին՝ վկայակոչելով Foreign Policy-ն։
Մեծ Բրիտանիան եւ Ֆրանսան ԱՄՆ-ի միակ գործընկերն են, որոնք դեռ Սուրիոյ մէջ զօրախումբեր ունին:
«Այդ երկիրները կը պարտաւորուին 10-15 տոկոս մեծցնելու զօրքերուն թուաքանակը: Այլ երկիրներ նոյնպէս կրնան որոշ քանակութեամբ զինուորներ ուղարկել, սակայն անոր դիմաց պէտք է վճարեն ԱՄՆ-ին»,- ըսած է ԱՄՆ վարչակազմի ներկայացուցիչը:
ԱՄՆ-ն եւ անոր գործընկերները 2014 թուականէն «Իսլամական պետութիւն» ահաբեկչական խմբաւորման դէմ Սուրիոյ եւ Իրաքի մէջ գործողութիւններ կ’իրականացնեն:
