«ԶԱՐԹՕՆՔ», ՊԷՅՐՈՒԹ – Թուրքիոյ Ազգային մեծ ժողովի պատգամաւոր՝ Կարօ Փայլան, Պոլսոյ Հայոց պատրիարք Մեսրոպ արքեպիսկոպոս Մութաֆեանի մահէն ետք, տեղապահի ընտրութեան օրուայ փոփոխութեան վերաբերեալ գրաւոր հարցում ուղղած է Թուրքիոյ ներքին գործերու նախարար Սուլէյման Սոյլուին:
«Արմէնփրես»-ի հաղորդմամբ՝ տեղապահի ընտրութիւնը պէտք է տեղի ունենար 2019 թուականի Յունիս 27-ին, սակայն ներքին գործերու նախարարութիւնը, Պոլսոյ կուսակալութեան միջոցով 2019 թուականի Յունիս 26-ին, առանց որեւէ պատճառաբանութեան յայտնած է, որ տեղապահի ընտրութիւնը պէտք է յետաձգուի մինչեւ 2019 թուականի Յուլիս 4:
Փայլան գրութեան մէջ հարցուցած է, թէ որն է Թուրքիոյ Հայոց պատրիարքարանի տեղապահի ընտրութեան օրուայ փոփոխութեան պատճառը, ինչու եւ ինչ իրաւական հիմքերով ՆԳ նախարարութիւնը միջամտած է հոգեւոր կառոյցի ներքին գործերուն եւ այլն:
