«ԶԱՐԹՕՆՔ», ՊԷՅՐՈՒԹ – 2026 թուականի ձմեռնային Ողիմպիական խաղերը տեղի պիտի ունենան Իտալիոյ Միլան եւ Քորդինա Տ’Ամբեցօ քաղաքներու մէջ:
«Արմէնփրես»-ի հաղորդմամբ՝ այս մասին Լոզանի մէջ կայացած ՄՈԿ-ի վեհաժողովի ժամանակ յայտարարեց Միջազգային ողիմպիական կոմիտէի նախագահ Թոմաս Պախը: Ձմեռնային խաղերը հիւրընկալելու դիմում ներկայացուցած էր նաեւ Սթոքհոլմը:
Իտալիան 4-րդ անգամ ըլլալով պիտի հիւրընկալէ Ողիմպիական խաղերը: 2022 թուականի ձմեռնային Ողիմպիական խաղերը պիտի ընդունի Փեքինը:
Ձմեռնային Ողիմպիական խաղերը առաջին անգամ իրականացուած են 1924 թուականէն: Առաջին խաղերը հիւրընկալած էր ֆրանսական Շամոնի քաղաքը: Քորդինա Տ’Ամբեցոն հեռաւոր 1956 թուականին արդէն մէկ անգամ ընդունած է խաղերը:
