ՆՈՐ ՕՐ, ԼՈՍ ԱՆՃԵԼԸՍ.- Դոկտ. Յովհաննէս Ահմարանեանի հեղինակած «Հայը եւ Հայաստանը Աստուածաշունչին մէջ» նոր լոյս տեսած գիրքը պիտի ներկայացուի Հինգշաբթի, 20 Յունիս 2019, երեկոյեան ժամը 7:30-ին, «Ապրիլ» գրատան մէջ (415 E. Broadway, Glendale, CA)։ Գիրքը պիտի ներկայացնէ Գաբրիէլ Մոլոյեանը։ Մուտքը ազատ է։ Տեղեկութիւններու համար հեռաձայնել՝ (818) 243-4112։
Գիրքը կը նկատուի այժմէական, խիստ գնահատելի եւ գիտելիքներով հարուստ աշխատասիրութիւն մը։ Հատորը կ՚անդրադառնայ եւ ցոյց կու տայ Հայուն գոյութիւնը Աստուածաշունչին մէջ, եւ թէ ինչպէս Հայը Աստուածաշնչական ժողովուրդ եղած է։
Դոկտ. Յովհաննէս Ահմարանեան ծնած է Պէյրութ, Լիբանան: Երկրորդական ուսումը ստացած է Զմմառու վանքին մէջ, ապա Հռոմ, ուր շարունակած է փիլիսոփայութեան եւ աստուածաբանական դասընթացքները: Հեղինակ է բազմաթիւ եւ բազմալեզու գիրքերու: Հրատարակութեան համար պատրաստ ունի աշխատասիրութիւններ: Եղած է Հայաստանի Գիտութիւններու Ազգային Ակադեմիայի եւ Ս. Էջմիածնի Գէորգեան ճեմարանի նախկին դասախօս:
Գիրքի ներկայացումը կազմակերպուած է «Ապրիլ» գրատան կողմէ։
