«ԶԱՐԹՕՆՔ», ՊԷՅՐՈՒԹ – Ելեւմուտքի եւ պետական պիւտճէի խորհրդարանական յանձնախումբը, յաջորդ շաբաթ, ինը նիստով, պիտի քննարկէ 2019 թուականի պիւտճէի նախագիծը։ Այս մասին, ըստ The Daily Star-ի, Ուրբաթ օր հաղորդեց Ազգային լրատուական գործակալութիւնը։
Առաջին նիստը, որ կը նախատեսուի գումարել Երկուշաբթի ժամը 10-ին, օրակարգի վրայ ունի երկու թեմա. Պիւտճէի վերաբերեալ հարց-պատասխան ու Ելեւմտական նախարար Ալի Հասան Խալիլի հետ անոր կապը եւ պիւտճէի յօդուածներուն ուսումնասիրութիւնը:
Յանձնաժողովը, այնուհետեւ մինչեւ Ուրբաթ, օրական պիտի գումարէ երկու նիստ, առաջինը՝ ժամը 10-ին եւ երկրորդը՝ ժամը 5-ին:
Մինչ տեղի կ՝ունենան նշեալ հանդիպումները՝ Խորհրդարանը նպատակ ունի մինչեւ Յուլիսի կէսը աւարտին հասցնելու 2019-ի պետական պիւտճէի նախագիծին քննարկումները:
Անցնող Երկուշաբթի տեղի ունեցած նիստին ընթացքին՝ օրէնսդիրները քուէարկեցին մինչեւ Յուլիսի կէսը երկարաձգելու արտակարգ միջոցառումը, որ կը կոչուի «անցումային տասներկուերորդ», անիկա կառավարութեան արտօնութիւն կու տայ շարունակելու պետական միջոցներ ծախսել նախորդ տարուան պիւտճէէն:
