«ԶԱՐԹՕՆՔ», ՊԷՅՐՈՒԹ –Մարոնի նախկին պատրիարք քարտինալ Մար Նասրալլա Պութրոս Սֆէյրի դագաղը Չորեքշաբթի տարուած է Պքերքէ, ուր մինչեւ ուշ գիշեր հաւաքուած են սգակիրներ՝ աղօթելու անոր հոգիին համար:
Հարիւրաւոր մարդիկ, Չորեքշաբթի առաւօտեան, հաւաքուած էին Աշրաֆիէի «Հոթէլ Տիօ» հիւանդանոցին մօտ, ուրկէ Պատրիարքին մարմինը կը տեղափոխէին Պքերքէ։ Ամբողջ ճանապարհին երկրի դրօշները խոնարհուած էին իբրեւ յարգանք վախճանած պատրիարքին։
Խոնարհուած էին նաեւ նախագահի նստավայրի՝ Պաապտայի դրօշները։
«Սֆէյր պատրիարքի վախճանումը մեծ կորուստ է բոլոր լիբանանցիներուն համար, քանի որ ան Լիբանանի պատմութիւնը գրեց ոսկէ տառերով եւ ազատութեան, ինքնիշխանութեան եւ անկախութեան ճանապարհին»,- Պքերքէի մէջ ըսած է տեղեկատւութեան նախարար Ժամալ Ժարրահ:
Պատրիարքի յուղարկաւորութիւնը տեղի կ’ունենայ այսօր, կ.ե. ժամը 5։00.ին, մարոնիներու եկեղեցւոյ նստավայրին մէջ, Պքերքէ:
Նշենք, որ Վարչապետ Սաատ Հարիրիի գրասենեակը Մայիս 15-ը եւ 16-ը յայտարարած էր սուգի օրեր՝ իբրեւ յարգանք Սֆէյր պատրիարքի:
