Մայր Աթոռ Սուրբ Էջմիածնից Հայրապետական Մեր օրհնութիւնն ու ջերմ շնորհաւորանքներն ենք բերում մեր ժողովրդին Յաղթանակի ու խաղաղութեան տօնի, Շուշիի ազատագրութեան եւ Պաշտպանութեան բանակի հիմնադրման օրերի առիթով:
Մայիսի 9-ի խորհուրդը աշխարհասփիւռ մեր ժողովրդի համար նուիրական է։ Այսօր մենք տօնում ենք Երկրորդ աշխարհամարտում եւ Արցախին պարտադրուած պատերազմում մեր հերոս հայրերի ու նրանց քաջարի որդիների սխրագործութիւնների յաղթանակը։ Հպարտ եւ երախտագէտ հոգով մեր խոնարհումն ենք բերում ռազմի դաշտում յանուն խաղաղութեան հերոսացածների յիշատակին, նաեւ յաղթանակի համար իրենց ջանքերը ներդրած նուիրեալներին:
Երկրորդ աշխարհամարտից շուրջ կէս դար յետոյ մենք կրկին հարկադրուած եղանք պաշտպանելու մեր ժողովրդի ազատ եւ անվտանգ կեանքի իրաւունքը՝ միայնակ դիմակայելով Արցախում մեր գոյութեանը սպառնացող հակառակորդին։ Արցախեան ազատամարտը, Շուշիի ազատագրումը յաջորդ սերունդներին փոխանցելու է մեր ազգի արիութեան, արժանապատուութեան եւ սեփական ուժերին ապաւինելու պատմութիւնը, յանուն խաղաղութեան հեղուած արեան արժեւորման բարձր գիտակցութիւնը։
Շուշիի ազատագրման յաղթական օրը հռչակուեց նաեւ տօն Պաշտպանութեան բանակի հիմնադրման, որը իր հայրենասէր եւ խիզախ զօրահրամանատարներով, սպաներով ու զինուորներով երաշխաւորն է Արցախ աշխարհում մեր ազգային իղձերի ու երազների իրականացման։
Ի խորոց սրտի Մեր աղօթքն է, որ Բարձրեալն Աստուած Իր Ամենազօր Սուրբ Աջի հովանու ներքոյ խաղաղութեան մէջ անվտանգ պահի Հայաստանն ու Արցախը, զօրացնի եւ օգնական լինի հայրենեաց պաշտպաններին, եւ երկնառաք օրհնութեամբ բարգաւաճի հայրենի մեր երկիրը եւ համայն ժողովուրդը համերաշխ, երջանիկ ու բարօր կեանքով:
Օրհնութեամբ`
ԳԱՐԵԳԻՆ Բ
ԿԱԹՈՂԻԿՈՍ ԱՄԵՆԱՅՆ ՀԱՅՈՑ
