«ԶԱՐԹՕՆՔ», ՊԷՅՐՈՒԹ – Նախարարները Ուրբաթ օր աւարտեցին 2019 թուականի պետական պիւտճէի նախագիծին վերաբերեալ քննարկումները:
Պիւտճէի նախագիծի ուսումնասիրութեան յատուկ քննարկումներուն համար տրամադրուած ժամանակի վերջին նստաշրջանը Ուրբաթ էր։ Կառավարութեան Հինգշաբթի օրուան նիստին՝ նախարարները հաստատած էին պիւտճէի 25 յօդուածները:
«Պիւտճէի քննարկումները դանդաղ կ’ընթանան, բայց եւ այնպէս բանակցութիւնները առարկայական են», – Ուրբաթ օրուան նիստէն առաջ լրագրողներուն ըսաւ պաշտպանութեան նախարար Իլիաս Պու Սաապ:
Լրատուամիջոցներուն համաձայն՝ Կառավարութիւնը Շաբաթ օր նիստ պիտի չգումարէ, սակայն բանակցութիւններ տեղի պիտի ունենայ Կիրակի երեկոյեան:
