ԶԱՐԹՕՆՔ», ՊԷՅՐՈՒԹ –Խորհրդարանի նախագահ Նեպիհ Պըրրի յայտարարած է, որ 2019 թուականի պետական պիւտճէն պէտք է ընդունուի եւ խորհրդարան ներկայացուի մինչեւ Մայիս 31, երբ երկարաձգուած ծախսերուն ժամկէտը լրանայ։ Այս մասին կը հաղորդէ Al Joumhouria-ն:
«Ես նախապէս ըսած եմ եւ կը կրկնեմ, (կառավարութիւնը պէտք է) շտապէ պիւտճէի հարցով եւ ժամանակ չվատնէ: Խորհրդարանը կը սպասէ, եւ կառավարութեան համար յստակ ժամանակ կայ, որ կ՝աւարտի Մայիս 31-ին»,- ըսած է Պըրրին իր այցելուներուն:
Մարտին, Խորհրդարանը հաւանութիւն տուաւ ընդարձակելու ծախսերուն չափը՝ մինչեւ Մայիսի վերջ: Այդ չափը արտակարգ դիւրութիւն մըն է Սահմանադրութեան մէջ, որ յայտնի է իբրեւ «ժամանակաւոր 12-րդ»:
Այդ ժամանակ Պըրրին կառավարութեան մէկ ու կէս ամիս տուաւ 2019 թուականի պիւտճէի հաստատման համար, որմէ ետք Խորհրդարանը պիտի ունենայ նոյն ժամկէտը՝ զայն վաւերացնելու համար:
Պըրրի նշած է, որ նախապէս կոչ ըրած էր Կառավարութեան հետեւողական նիստեր իրականացնելու պիւտճէի հաստատման եւ զայն խորհրդարան ուղարկելու համար: «Ոչինչ կը խանգարէ Կառավարութիւնը պիւտճէի հետ գործարքը կատարելուն, յատկապէս հաշուի առնելով, որ բոլոր կողմերուն դիրքորոշումները յստակ են։ Ուստի աւելի ուշացնելու պատճառ չկայ»,- ըսած է ան:
Վարչապետ Սաատ Հարիրին կը փորձէր քաղաքական համաձայնութիւն ապահովել խնայողութիւններու միջոցներուն հաշուին, զորս կառավարութիւնը մտադիր է ընդունելու 2019-ի պիւտճէին մէջ, որպէսզի եկամուտներ ապահովէ, կրճատէ պիւտճէի պակասը եւ խթանէ տնտեսութեան լարուածութիւնը:
