ՆՈՐ ՕՐ, ԼՈՍ ԱՆՃԵԼԸՍ.- Երեքշաբթի, Ապրիլ 9-ի երեկոյեան, Ալթատինայի «Պէշկէօթիւրեան» կեդրոն այցելեց Հայաստանի Արտաքին գործոց նախարարութեան գլխաւոր քարտուղար Վահագն Մելիքեանը եւ հանդիպում ունեցաւ Ռամկավար Ազատական Կուսակցութեան Արեւմտեան Ամերիկայի Շրջանային վարչութեան հետ։
Վահագն Մելիքեանին կ’ընկերանային Գլխաւոր հիւպատոս Դոկտ. Արմէն Բայբուրդեան եւ հիւպատոսի խորհրդական Վարազդատ Պահլաւունի:
Յարգելի հիւրը արեւելագէտ է եւ Հայաստանի անկախութենէն իվեր բազմաթիւ պաշտօններ վարած է Հայաստանի Արտաքին գործոց նախարարութենէն ներս՝ աշխարհի տարբեր երկիրներու մէջ։
Հանդիպումը առիթ հանդիսացաւ, արծարծելու Հայաստանի արտաքին քաղաքականութեան հետ առնչուող հարցեր, Հայաստանի եւ Արցախի անվտանգութիւնը, սփիւռքահայութեան հետ կապերու Հայաստանի առողջ քաղաքականութիւնը։
