«ԶԱՐԹՕՆՔ», ՊԷՅՐՈՒԹ – Լիբանանի Հանրապետութեան խորհրդարանի նախագահ Նապիհ Պըրրի վերահաստատեց սուրիական վարչակարգին հետ գործակցաբար սուրիացի գաղթականութեան հայրենադարձութեան կազմակերպչական աշխատանքներուն ձեռնամուխ ըլլալու կարեւորութիւնը: Այս մասին իրազեկ կը դառնանք խորհրդարանի նախագահի տեղեկատուական գրասենեակի հրապարակած տեղեկագրութենէն:
«Մենք այլեւս ի վիճակի չենք տանելու այս վիճակը: Սուրիական վարչակարգին հետ այս հարցի լուծումին շուրջ գործակցութիւնը հրամայական է»,– ըսաւ Պըրրի: Նշենք, որ խորհրդարանի նախագահը Քաթարի Պետութիւն ժամանեց Շաբաթ՝ մասնակցելու Միջխորհրդարանական միութեան 140-րդ համագումարին: