«ԶԱՐԹՕՆՔ», ՊԷՅՐՈՒԹ – Վենեզուելայի Պոլիվարական Հանրապետութեան արտաքին գործոց նախարար Խորխէ Արէասա հանդիպում ունեցաւ Լիբանանի Հանրապետութեան նախագահ Միշէլ Աունի հետ:
Ինչպէս կը տեղեկանանք նախագահական գրասենեակի հրապարակած հաղորդագրութենէն, հանդիպումին արտաքին գործոց նախարար Արէասան նախագահ Աունին փոխանցեց Վենեզուելայի նախագահ Նիքոլաս Մատուրոյի նամակը՝ կապուած երկրի այժմու իրավիճակին:
Պաապտայի նախագահանիստ պալատին մէջ տեղի ունեցած հանդիպումին զրուցակիցները քննարկեցին երկկողմ յարաբերութիւններուն վերաբերող շարք մը հարցեր: Նշենք, որ Վենեզուելայի մէջ կ’ապրի մօտ 350 000 լիբանանցի:
Արէասա, որ Պէյրութ ժամանեց Երեքշաբթի երեկոյեան, հանդիպում ունեցաւ արտաքին գործոց նախարար Ժպրան Պասիլի հետ: Երկուստեք անդրադարձ կատարեցին երկկողմանի յարաբերութիւններուն եւ Վենեզուելայի մէջ լիբանանցի բնակչութեան վերաբերող խնդիրներու: Այս մասին կը նշուի Լիբանանի արտաքին գործոց նախարարութեան յայտարարութեան մէջ:
