«ԶԱՐԹՕՆՔ», ՊԷՅՐՈՒԹ – Վարչապետ Նիկոլ Փաշինեան Հայաստանի Ազգային պատկերասրահին մէջ ներկայ գտնուած է դիւանագէտի օրուան կապակցութեամբ տեղի ունեցած ընդունելութեան:
Ինչպէս կը հաղորդէ «Արմէնփրես»-ը, ՀՀ կառավարութեան տեղեկատուութեան եւ հասարակայնութեան հետ կապերու վարչութենէն կը տեղեկացնեն, որ, շնորհաւորելով դիւանագէտները, տօնական օրուան առթիւ Նիկոլ Փաշինեան մասնաւորաբար նշած է.
«Ազգային ժողովի մեծարգո՛յ նախագահ,
Կառավարութեան յարգելի՛ անդամներ,
Արտաքին գործերի յարգելի՛ նախարար,
Յարգելի՛ դիւանագէտներ,
Պետական այրե՛ր,
Հայաստանում հաւատարմագրուած դիւանագիտական կորպուսի յարգելի՛ ներկայացուցիչներ,
Շնորհաւորում եմ դիւանագէտի օրուայ կապակցութեամբ: Սա իսկապէս կարեւոր օր է մեր պետութեան համար: Թոյլ տուէք արձանագրել, որ հերթական այս օրը մեր դիւանագիտական համակարգը դիմաւորում է բոլորովին այլ պայմաններում եւ այլ իրավիճակում: Այսօր բարեբախտաբար մեր դիւանագէտներն ամբողջ աշխարհում կարիք չունեն երկար օրեր ու ժամանակ ծախսել տարբեր երկրներում բացատրութիւններ տալու, թէ ընտրութիւնները քանի տոկոսով են կեղծուել, միւս ընտրութիւնները քանի տոկոսով չեն կեղծուի, այս ընտրութիւնները քանի քայլ էին առաջ, քանի քայլ հետ, ով, որտեղ, որ անկիւնում՝ ո՞ւմ, ինչի՞ համար գնդակահարեց: Սա, կարծում եմ, կարեւոր փոփոխութիւն է, որն արտայայտում է Հայաստանում տեղի ունեցած ոչ բռնի, թաւշեայ, ժողովրդական յեղափոխութեան էութիւնը:
Իմ յոյսն այն է, որ այս փոփոխութիւնը ոչ թէ կընկալուի որպէս աւելի պակաս աշխատելու, այլ հակառակը՝ աւելի շատ, աւելի ոգեւորուած, աւելի մեծ եռանդով աշխատելու հրամայական, որովհետեւ այսօր Հայաստանի Հանրապետութիւնն աշխարհին ներկայացնելու բան ունի եւ այսօր Հայաստանի Հանրապետութեանը լսելու ցանկութիւնը շատ աւելի մեծ է աշխարհի բոլոր կողմերում:
Եւ շատ կարեւոր է արձանագրել այն կարեւորագոյն փոփոխութիւնը, որ տեղի է ունենում հիմա Հայաստանում՝ կառավարման բոլոր համակարգերում, այդ թուում՝ դիւանագէտների շրջանում, որ պէտք է տեղի ունենայ եւ մենք պէտք է արձանագրենք, որ ինչպէս ամբողջ կառավարութիւնը, այնպէս էլ դիւանագէտները ծառայում են ոչ թէ կոնկրետ անձի, ոչ թէ կոնկրետ իշխանութեան, այլ ծառայում են ժողովրդին: Այս առումով նոյնպէս մենք ուրիշ իրավիճակում ենք Հայաստանի Հանրապետութիւնում, որովհետեւ իշխանութիւնը ձեւաւորուած է ժողովրդի ազատ կամարտայայտման միջոցով:
Վարչապետ ընտրուելով, հենց առաջին օրուանից ես առաջնորդուել եմ այն կանխավարկածով, որ դիւանագէտները, դիւանագիտական համակարգը մեր երկրում ամենակայացած պետական համակարգերից է, եւ մենք ամէն ինչ արել ենք, որպէսզի համակարգն իր կայունութիւնը, բնականոն գործունէութիւնն ապահովի: Այս պայմաններում բնականաբար ակնկալում եմ, որ Հայաստանի դիւանագիտական ներկայացուցիչները, ընդհանրապէս ողջ դիւանագիտական համակարգը պատշաճ ձեւով ամբողջ աշխարհում ներկայացնի Հայաստանում տեղի ունեցած փոփոխութիւնները եւ համոզուած եմ, որ պատշաճ մակարդակով համակարգը կը ծառայի Հայաստանի Հանրապետութեանը եւ նրա ժողովրդին:
Եւ բոլոր դիւանագէտները, ովքեր բաց են թողել քաղաքական յեղափոխութեանը մասնակցելու պատեհութիւնը՝ այսօր լաւ առիթ ունեն մասնակցելու տնտեսական յեղափոխութեանը, լինել տնտեսական յեղափոխութեան աքթիվիստ՝ բառիս աշխատանքային իմաստով, այսինքն՝ ամբողջ աշխարհում դառնալ Հայաստանի Հանրապետութեան եւ Հայաստանի Հանրապետութիւնում տեղի ունեցող փոփոխութիւնների եւ դրանց բովանդակութեան ներկայացման դեսպանը:
Այս առումով, շատ կարեւոր եմ համարում նաեւ Լեռնային Ղարաբաղի հարցում մեր առաջիկայ անելիքները, որովհետեւ մեր նախորդ հանդիպման ընթացքում էլ ասել եմ, որ այս ընթացքում իմ ունեցած միջազգային շփումները բերել են այն եզրակացութեան, որ, ցաւօք, սրտի, միջազգային ասպարէզում շատ դէպքերում կորսուել է Լեռնային Ղարաբաղի հարցի էութեան մասին պատկերացումն ու ընկալումը: Սա մեր առաջիկայ խնդիրներից կարեւորագոյնն է եւ, ըստ էութեան, անհրաժեշտ է հետեւողական աշխատանք տանել, որպէսզի Լեռնային Ղարաբաղի հարց ասելով միջազգային ասպարէզում հասկանան այն, ինչ նկատի է առնուում եւ ինչպիսին կայ Լեռնային Ղարաբաղի հարցն իր էութեամբ:
Մենք պէտք է շարունակենք նաեւ Հայոց ցեղասպանութեան միջազգային ճանաչմանն ուղղուած քաղաքականութիւնը: Մենք յստակ արձանագրում ենք, որ Հայոց ցեղասպանութեան միջազգային ճանաչումը կլոպալ անվտանգութեան եւ ցեղասպանութիւնների կանխարգելման ուղղութեամբ մեր կարեւոր ներդրումն է եւ մենք այդ հարցը դիտարկում ենք այս տեսանկիւնից:
Շնորհակալութիւն յայտնելով մեր բոլոր դիւանագէտներին իրենց ծառայութեան համար, ցանկանում եմ յատկապէս ընդգծել այն դիւանագէտներին, ովքեր այս շրջանում աշխատում են անկայուն տարածաշրջաններում, անվտանգային բարդ միջավայրերում: Մասնաւորապէս, խորին յարգանքի է արժանի Հալէպում մեր գլխաւոր հիւպատոսութեան անխափան աշխատանքը, չնայած նրան, որ շէնքը ենթարկուել է հրթիռակոծութեան: Նոյնը պէտք է ասել Պաղտատում մեր դեսպանութեան գործունէութեան մասին՝ չնայած այդ երկրում տիրող վտանգաւոր իրավիճակին:
Անշուշտ, մեր արտաքին քաղաքականութեան առջեւ դրուած խնդիրների յաջողութեամբ իրագործումը կախուած է մեր Արտաքին գործերի նախարարութեան ողջ անձնակազմի, այդ թուում՝ արտերկրում մեր դեսպանութիւնների եւ հիւպատոսութիւնների միահամուռ աշխատանքից:
Ուստի, յարգելի դիւանագէտներ, եւս մէկ անգամ շնորհաւորում եմ ձեզ եւ ցանկանում ստեղծագործական նոր մօտեցումներ, որովհետեւ արդի ժամանակները ստեղծագործելու եւ նոր յաջողութիւնների հասնելու լայն հնարաւորութիւններ են: Բոլորիդ մաղթում եմ նորանոր ձեռքբերումներ՝ ի շահ եւ ի բարօրութիւն Հայաստանի Հանրապետութեան, Արցախի Հանրապետութեան եւ հայ ժողովրդի:
Պարոն Մնացականեան, անձամբ Ձեզ մաղթում եմ յաջողութիւններ ինչպէս ընդունուած է ասել այս դժուար եւ բարդ կելեկտիվին առաջնորդելու գործում: Նաեւ ուզում եմ իմ գնահատանքի խօսքն ասել Երրորդ Հանրապետութեան Արտաքին գործերի բոլոր նախարարներին՝ այն ջանքերի համար, որ նրանք ներդրել են Հայաստանի դիւանագիտական համակարգի կայացման համար: Շնորհաւոր դիւանագէտի օրը»: