«ԶԱՐԹՕՆՔ», ՊԷՅՐՈՒԹ – Անհնար է Լիբանանի տնտեսական իրավիճակի բարելաւումը, մինչեւ պետական միլիոնաւոր գումարներու կորուստի մանրակրկիտ հետաքննութիւնը: Այս մասին յայտնեց երեսփոխան, Հզպալլայի հակակաշառակերութեան պիւրոյի պատասխանատու Հասան Ֆատլալլա:
«Մենք կ’անգիտանանք, թէ պետական ելեւմտական հաշիւներէն միլիառաւոր գումարները ո՛ւր ծախսուած են»,- ըսաւ ան մամլոյ հեռարձակուող ասուլիսին՝ ներկայացնելով Լիբանանի ելեւմտական գոյավիճակը որպէս «կազմակերպուած քաոս»:
«Այդ մեծաքանակ գումարներու շարքին են պետական կառոյցներու, որոնց կարգին՝ Electricite du Liban-ին եւ Օգնութեան բարձրագոյն խորհուրդին տրուած կանխավճարները, որոնք ծախսուած են առանց օրինական արդարացումի կամ յստակ բացատրութեան»,- ըսաւ ան: