«ԶԱՐԹՕՆՔ», ՊԷՅՐՈՒԹ – ԱՄՆ-ի նախագահ Տոնալտ Թրամփ յայտարարած է, որ պիտի յետաձգէ 200 միլիառ տոլար ընդհանուր արժողութեամբ չինական ապրանքներու մաքսերու՝ Մարտ 1-ին ծրագրուած բարձրացումը՝ նշելով էական յառաջընթացը Փեքինի հետ բանակցութիւններուն, կը հաղորդէ «Արմէնփրես»-ը:
«Ուրախ եմ յայտնելու, որ ԱՄՆ-ը էական յառաջընթացի հասած է Չինաստանի հետ առեւտուրի շուրջ բանակցութիւններուն: Հաշուի առնելով այդ բանակցութիւններուն արդիւնաւէտութիւնը՝ ես կը յետաձգեմ մաքսերու բարձրացումը, որ այժմ ծրագրուած է Մարտ 1-ին»,- Փետրուար 24-ին գրած է ան իր Twitter-ի էջին վրայ: Մասնաւորապէս, Թրամփի խօսքով՝ յառաջընթաց ձեռք բերուած է այնպիսի թեմաներու շուրջ, ինչպէս՝ «մտաւոր սեփականութեան պաշտպանութիւնը, արհեստագիտութիւններու յանձնումը, գիւղատնտեսութիւնը, ծառայութիւնները, արժոյթը» եւ այլ բնագաւառներ: Միացեալ Նահանգներու ղեկավարը նաեւ յայտնած է, որ կը ծրագրէ Ֆլորիտայի իր առանձնատունը ընդունիլ Չինաստանի նախագահ Շի Ճինփինկը եւ անոր հետ մշակել առեւտուրի վերաբերեալ համաձայնութիւնները: Իր հերթին, Չինաստանի առեւտուրի նախարարութենէն յայտարարած են, որ Փեքինը եւ Ուաշինկթընը զգալի յառաջընթացի հասած են Ուաշինկթընի մէջ կայացած առեւտրական բանակցութիւններուն, հաղորդած է «ՌԻԱ նովոսթի»-ն:
