«ԶԱՐԹՕՆՔ», ՊԷՅՐՈՒԹ – «Դեղին բաճկոնաւորներու» շարժումը աստիճանաբար կը կորսնցնէ Ֆրանսայի բնակիչներուն ժողովրդականութիւնը: Այդ մասին, ինչպէս կը հաղորդէ «Արմէնփրես»-ը, կը վկայէ հասարակական կարծիքը: Նշենք, որ ֆրանսական շարք մը լրատուամիջոցներ, այդ կարգին՝ «L’Express»-ը եւ «France Inter»-ը հարցախոյզ իրականացուցած են: Հարցումին պատասխանած անձանց 55 տոկոսը յայտարարած է, որ կը ցանկար «դեղին բաճկոնաւորներու» ցոյցերու դադրեցում:
Մինչդեռ Յունուար 23-ին տեղի ունեցած հարցախոյզի տուեալներով՝ ֆրանսացիներու 51 տոկոսը հանդէս կու գար բողոքի ցոյցերը շարունակելու օգտին: Միեւնոյն ժամանակ Ֆրանսայի նախագահ Էմանուել Մաքրոնի վարկանիշը բարձրացած է մինչեւ 32 տոկոս՝ 2018 թուականի Նոյեմբերի կէսերէն ի վեր առաւելագոյն ցուցանիշ, երբ տեղի ունեցած են «դեղին բաճկոնաւորներու» առաջին ցոյցերը: Այսպիսով, նախագահին վարկանիշը մէկ ամսուան մէջ աճած է 2 տոկոսային կէտով, իսկ Դեկտեմբերին Մաքրոնի ժողովրդականութիւնը նուազած էր մինչեւ 27 տոկոս: Հարցախոյզի տուեալները ցոյց տուած են վարչապետ Էտուար Ֆիլիփի ժողովրդականութեան աճը 1 տոկոսային կէտով՝ մինչեւ 33 տոկոս, հաղորդած է «Ինթերֆաքս»-ը: