«ԶԱՐԹՕՆՔ», ՊԷՅՐՈՒԹ – ԱՄՆ-ի նախագահ Տոնալտ Թրամփ յայտնած է, որ կը քննէ պիւտճէական փոխզիջումը, որ առաջարկուած է քոնկրեսին մէջ երկու կուսակցութիւններու բանակցութիւններուն, կը հաղորդէ «Արմէնփրես»-ը:
ԱՄՆ-ի մէջ արդէն Փետրուար 15-ին կրնայ վրայ հասնիլ հերթական շաթտաունը (shutdown)՝ դաշնային գերատեսչութիւններու աշխատանքի կրճատումը հաստատուած պիւտճէի բացակայութեան պայմաններուն մէջ:
Գործարքը կ’ենթադրէ 88 քիլոմեթր երկարութեամբ արգելապատերու կառուցում սահմանին եւ անոր համար 1.4 միլիառ տոլարի յատկացում՝ 5.7 միլիառի փոխարէն, որ պահանջած է Թրամփը:
«Ես կը քննեմ բոլոր երեւոյթները՝ գիտնալով, որ այդ (միջոցները) կը միացուին մեծաքանակ գումարներու այլ աղբիւրներէ: Մենք գրեթէ 23 միլիառ տոլար կը ստանանք սահմանի անվտանգութեան համար: Անկախ արգելապատի համար յատկացուած գումարէն, ան արդէն այժմ կը կառուցուի»,- գրած է Թրամփը Twitter-ի վրայ, հաղորդած է «ՌԻԱ նովոսթի»-ն:
