ՆՈՐ ՕՐ, ԼՈՍ ԱՆՃԵԼԸՍ.- Լոս Անճելըսում ՀՀ գլխաւոր հիւպատոսութիւնը իր մտահոգութիւնն է յայտնում երկու հայկական ամենօրեայ դպրոցներում՝ Էնսինոյի Ս. Նահատակների Ֆերահեան և Քանոկա Փարքի ՀԲԸՄ Մանուկեան-Տեմիրճեան կրթօջախներում տեղի ունեցած յանցագործութեան առիթով և խիստ դատապարտում է ատելութեան դրսևորումները՝ ուղղուած հայկական կրթօջախների և Լոս Անճելըսի ամբողջ հայ համայնքի դէմ: ՀՀ գլխաւոր հիւպատոսութիւնը սատար է կանգնում լոսանճելըսահայ համայնքի դրսևորած միասնական կեցուածքին: ՀՀ գլխաւոր հիւպատոսութիւնը, լուրը ստանալուն պէս, կապ է հաստատել Լոս Անճելըսի քաղաքային իշխանութիւնների հետ՝ յանցագործութեան հետաքննութեանը հետամուտ լինելու նպատակով: Ցեղասպանութիւնից փրկուած սերնդի կողմից հիմնադրուած կրթօջախներում ատելութեան նման դրսևորումները վիրաւորանք են՝ ուղղուած Հայոց Ցեղասպանութեան նահատակներին և նրանց սերունդներին: Համայնքային կառոյցների, Լոս Անճելըսի քաղաքային իշխանութիւնների և իրաւապահ մարմինների հետ սերտ գործակցութեամբ հետամուտ ենք լինելու յանցագործների բացայայտմանը և պատժին՝ յետագայում նման դէպքերն իսպառ բացառելու նպատակով:
