«ԶԱՐԹՕՆՔ», ՊԷՅՐՈՒԹ – Յառաջիկայ շաբաթ կը նախատեսուի Իտալիոյ Հանրապետութեան վարչապետ Ճուզեփփէ Քոնթէի ժամանումը Լիբանան: Այս լուրը հաստատած է Լիբանանի մէջ Իտալիոյ Հանրապետութեան դեսպանատունը:
Այցի ծիրէն ներս Քոնթէ հանդիպում պիտի ունենայ նախագահ Միշէլ Աունի, վարչապետի պաշտօնակատար Սաատ Հարիրիի եւ խորհրդարանի նախագահ Նապիհ Պըրրիի հետ: Այս մասին կը հաղորդէ ազգային լրատուական գործակալութիւնը:
Իտալիոյ արտաքին գործոց նախարարութիւնը հաւաստեց, որ Լիբանանի նոր կառավարութեան կազմաւորումը երաշխիք պիտի հանդիսանայ վերջինիս ցուցաբերած զօրակցութեան շարունակականութեան եւ ամրապնդումին:
Նշենք, որ Իտալիոյ պաշտպանութեան նախարարութիւնը կարեւորեց իտալական զինուած ուժերու ունեցած դերակատարութիւնը Լիբանանի Հանրապետութեան մէջ Իսրայէլի հետ սահմանին ՄԱԿ-ի խաղաղապահ ուժերու առաքելութեան մէջ:
