Թուրքիոյ Պուրսա նահանգի Իզնիկ շրջանին մէջ, յատուկ պահպանութեան տակ առնուած 1700-ամեայ խճանկարը աղբանոցի վերածուած է։ Այս մասին կը հաղորդէ Ermenihaber.am-ը՝ վկայակոչելով diken.com.tr-ը։
Չորրորդ դարէն մեր օրեր հասած խճանկարը կը գտնուի Իզնիկի՝ թանգարանի վերածուած Այա Սոֆիա եկեղեցւոյ հարեւանութեամբ։ Այս պատմամշակութային ստեղծագործութեան պահպանութեան համար խճանկարի վրայ տեղադրուած էր երկաթեայ հսկայ ճաղավանդակ: Բայց նոյնիսկ այդ պարագային, տեղի բնակչութիւնը տարածքը ծածկած է աղբակոյտերով։ Իսկ եղանակային պայմանները, իրենց հերթին, աւելի կը վնասեն խճանկարը։
Իզնիկի քաղաքապետ Օսման Սարկըն նշած է, որ տարածքի մաքրութիւնը ժամանակ առ ժամանակ կը կազմակերպուի, սակայն իր գրաւած դիրքին եւ մայրուղիին մօտ գտնուելուն պատճառով՝ տարածքը կարճ ժամանակ անց կրկին կ՝աղտոտուի։
