«ԶԱՐԹՕՆՔ», ՊԷՅՐՈՒԹ – Վարչապետի պաշտօնակատար Սաատ Հարիրի վերադարձաւ Պէյրութ: Այս մասին հաղորդած է Հարիրիի մօտ աղբիւր մը, մինչ կառավարութեան կազմաւորման գործընթացը, ըստ Հարիրիի, թեւակոխեց վճռական շաբաթ մը:
Նշենք, որ Հարիրի կը գտնուէր Փարիզ ընտանեկան այցելութեան նպատակով: Այնուամենայնիւ, վարչապետի պաշտօնակատարը այդ միջոցին շարք մը հանդիպումներ ունեցաւ հանգուցալուծելու կառավարութեան կազմաւորման գործընթացին մէջ առկայ փակուղին: Ան առանձին տեսակցութիւններ ունեցաւ արտաքին գործոց նախարարի պաշտօնակատար Ժպրան Պասիլի եւ Լիբանանեան ուժեր կուսակցութեան առաջնորդ Սամիր Ժաաժաաի հետ:
Նախքան երկրէն մեկնիլը, Հարիրի հանդիպում ունեցաւ նաեւ քաղաքական աւագ պաշտօնատարներու հետ՝ ազդանշելով դրական զարգացումներու հաւանականութիւնը 9-ամսեայ փակուղիի լուծման կապակցութեամբ:
