«ԶԱՐԹՕՆՔ», ՊԷՅՐՈՒԹ – Ֆրանսայի ԱԳ նախարար Ժան Իվ լէ Տրիանը յայտարարած է, որ Փարիզը պատրաստ է Իրանի նկատմամբ պատժամիջոցներ սահմանելու իրանական ձգաբանական հրթիռներուն շուրջ բանակցութիւններուն յառաջընթացի բացակայութեան պարագային: Այդ մասին, ինչպէս կը հաղորդէ «Արմէնփրես»-ը, յայտնած է «Reuters» գործակալութիւնը:
«Մենք շատ դժուարին երկխօսութիւն սկսած ենք… Մենք պատրաստ ենք, եթէ ատիկա դրական արդիւնքի չյանգեցնէ, կոշտ պատժամիջոցներ կիրարկելու, եւ անոնք այս մէկը լաւապէս գիտեն»,- ըսած է ան:
Աւելի կանուխ, Ֆրանսայի ԱԳ նախարարութիւնը դատապարտած է Իրանի կողմէ կրող հրթիռով արբանեակի արձակումը՝ ընդգծելով, որ նման գործողութիւնները չեն համապատասխաներ ՄԱԿ-ի անվտանգութեան խորհուրդի բանաձեւին: Բացի այդ՝ Փարիզը կոչ ըրած է «Իրանին՝ չիրականացնելու ձգաբանական հրթիռներու նոր արձակումներ, որոնք կրնան միջուկային զէնք կրել», հաղորդած է «ՌԻԱ նովոսթի»-ն:
