«ԶԱՐԹՕՆՔ», ՊԷՅՐՈՒԹ – Հայաստանի Հանրապետութեան Ազգային ժողովի նախագահ Արարատ Միրզոյեան Յունուար 24-ին ընդունած է Հայաստանի մէջ Իրանի Իսլամական Հանրապետութեան արտակարգ եւ լիազօր դեսպան Սեյետ Քազեմ Սաժատին:
Ինչպէս կը հաղորդէ «Արմէնփրես»-ը, ՀՀ Ազգային ժողովի լրատուութեան եւ հանրութեան հետ կապերու վարչութենէն կը տեղեկացնեն, որ խորհրդարանի ղեկավարը, ողջունելով հիւրը, կարեւորած է հայ-իրանական յարաբերութիւններու ներկայ մակարդակը` խարսխուած դարաւոր բարեկամութեան եւ փոխվստահութեան ամուր հիմքերուն վրայ:
Արարատ Միրզոյեան բարձր գնահատած է դեսպանի ջանքերն ու հետեւողական աշխատանքը երկկողմ յարաբերութիւններու օրակարգը աւելի ընդգրկուն դարձնելու հարցին մէջ` վստահեցնելով, որ Ազգային ժողովն ալ պատրաստակամ է աջակցելու անոնց ընդլայնման ուղղուած որեւէ փոխշահաւէտ նախաձեռնութեան:
Անդրադառնալով միջխորհրդարանական գործակցութեան՝ օրէնսդիր մարմինի ղեկավարը կարեւորած է բարեկամական խումբերու գործակցութիւնը, ինչը կը նպաստէ երկկողմ կապերու աշխուժացման:
Սեյետ Քազեմ Սաժատին, շնորհաւորելով Արարատ Միրզոյեանը պաշտօնը ստանձնելու կապակցութեամբ, յաջողութիւն մաղթած է: Դեսպանը, արժեւորելով միջազգային հարթակներու վրայ Իրանի եւ Հայաստանի արդիւնաւէտ գործակցութիւնը, վստահեցուցած է, որ Իրանը մշտապէս եղած է եւ կը շարունակէ մնալ Հայաստանի կողքին:
Սեյետ Քազեմ Սաժատին կարեւորած է բարձր մակարդակի փոխայցերը` նշելով, որ անոնք աւելի կը սերտացնեն երկու երկիրներու եւ ժողովուրդներու յարաբերութիւնները:
Զրուցակիցները քննարկած են երկկողմ բազմոլորտ գործակցութեան օրակարգը, կարեւորած մասնաւորապէս առեւտրատնտեսական կապերու խթանումը եւ ընդգծած, որ հայ-իրանական գործակցութեան զարգացման եւ ընդլայնման տակաւին չօգտագործուած մեծ ներուժ կայ: Կողմերը համոզում յայտնած են, որ տնտեսական կապերու խորացման կրնայ նպաստել նաեւ Մեղրիի եւ Արազի ազատ տնտեսական գօտիներու ընձեռած հնարաւորութիւններու արդիւնաւէտ օգտագործումը:
Դեսպանը Արարատ Միրզոյեանին փոխանցած է Ալի Լարիժանիի ողջոյնները եւ Իրան այցելելու հրաւէրը:
