«ԶԱՐԹՕՆՔ», ՊԷՅՐՈՒԹ – ՀՀ վարչապետ Նիկոլ Փաշինեան Տաւոսի մէջ ընթացող Համաշխարհային տնտեսական համաժողովի ծիրէն ներս կարճատեւ հանդիպումներ ունեցած է Պրազիլի նախագահ Ժայիր Պոլսոնարուի, Լիւքսեմպուրկի վարչապետ Քսավիէ Պեթելի եւ Եգիպտոսի վարչապետ Մուսթաֆա Մատպուլիի հետ:
Ինչպէս կը հաղորդէ «Արմէնփրես»-ը, ՀՀ կառավարութեան տեղեկատուութեան եւ հասարակայնութեան հետ կապերու վարչութենէն կը տեղեկացնեն, որ վարչապետ Նիկոլ Փաշինեան եւ Պրազիլի նախագահ Ժայիր Պոլսոնարուն անդրադարձած են երկու երկիրներու գործակցութեան օրակարգային տարբեր հարցերու: Անոնք բարձր գնահատած են հայ-պրազիլական բարեկամական յարաբերութիւններու մակարդակը եւ նշած գործակցութեան ոլորտներու ընդլայնումի կարեւորութիւնը:
Լիւքսեմպուրկի վարչապետ Քսավիէ Պեթելի հետ հանդիպումին քննարկուած են երկու երկիրներու յարաբերութիւններուն առնչուող հարցեր: Նիկոլ Փաշինեան եւ Քսավիէ Պեթելը կարեւորած են տնտեսական գործակցութեան զարգացումն ու առեւտրատնտեսական կապերու ընլայնումը: Այդ առումով, կողմերը ընդգծած են երկու երկիրներու կառավարութիւններուն միջեւ յարաբերութիւններու աշխուժացման եւ գործնական քայլերու իրականացման անհրաժեշտութիւնը:
Եգիպտոսի վարչապետ Մուսթաֆա Մատպուլիի հետ հանդիպումին քննարկուած են երկու երկիրներու միջեւ տնտեսական գործակցութեան, այդ կարգին` գործարար կապերու խորացման վերաբերող հարցեր: Նիկոլ Փաշինեան եւ Մուսթաֆա Մատպուլին ընդգծած են առեւտրական համաժողովներու կայացման անհրաժեշտութիւնը, որոնց ընթացքին գործնականօրէն կը քննարկուին համատեղ ներդրումային ծրագիրներու իրականացման հնարաւորութիւններն ու ուղղութիւնները: Զրուցակիցները կարեւորած են Եւրասիական տնտեսական միութեան եւ Եգիպտոսի միջեւ ազատ առեւտուրի համաձայնագիրի ստորագրումը: Մուսթաֆա Մատպուլին նշած է, որ այդ գործին մէջ կ’ակնկալէ Հայաստանի կառավարութեան աջակցութիւնը:
