«ԶԱՐԹՕՆՔ», ՊԷՅՐՈՒԹ – Սուրիոյ Հանրապետութեան մէջ իրավիճակի կայունութեան ապահովումը եւ դաւանանքային բաժանումներու վերացումը լիովին կը բխի Լիբանանի շահերէն: Այս մասին ըսաւ արտաքին գործոց նախարարի պաշտօնակատար Ժպրան Պասիլ, որ այժմ կը գտնուի Զուիցերիոյ Տաւոս քաղաքը՝ մասնակցելու 2019-ի համաշխարհային տնտեսական համաժողովին:
Նշենք, որ արտաքին գործոց նախարարի պաշտօնակատարը վերոյիշեալ հաստատումները կատարեց «Խաղաղութիւն եւ հաշտութիւն բազմաբեւեռ աշխարհի մը մէջ» խորագրով ուղերձին ժամանակ: Այս թեմայի լոյսին տակ Պասիլ վեր հանեց Լիբանանի Հանրապետութեան առանձնայատկութիւններէն մէկը՝ դիտել տալով, թէ կարելի չէ գտնել այլ պետութիւն մը, որ նման գործակցութիւն կը ծաւալէ՝ երկիրը ղեկավարելու համար:
