«ԶԱՐԹՕՆՔ», ՊԷՅՐՈՒԹ – Ամերիկայի Միացեալ Նահանգներու կեդրոնական հրամանատարութեան պետ Ճոզեֆ Վոթել Լիբանանի Հանրապետութեան նախագահ Միշէլ Աունի հետ հանդիպումին վերահաստատեց ԱՄՆ-ի ամբողջական զօրակցութիւնը Լիբանանին եւ անոր բանակին:
Պաապտայի պալատին մէջ նախագահ Աունի հետ Վոթելի հանդիպումը կը նպատակադրէր վերահաստատել ԱՄՆ-ի լիակատար զօրակցութիւնն ու Լիբանանի կայունութիւնը եւ բարգաւաճումը ապահովելու հակուածութիւնը: Այս մասին յայտարարութեամբ մը նշեց ԱՄՆ դեսպանութիւնը:
Հանդիպումին Վոթել գնահատեց լիբանանեան բանակի կատարողականութեան մակարդակի նկատառելի բարձրացումը: Այս մասին հաղորդեց Լիբանանի նախագահութեան տեղեկատուական գրասենեակը:
Աուն անդրադարձ կատարեց Վոթելի՝ լիբանանեան-ամերիկեան բանակի գործակցութիւնը ամրապնդելու գործին մէջ ունեցած դերակատարութեան, ինչը մեծապէս օգնեց լիբանանեան բանակին արմատախիլ ընելու երկրի արեւելեան սահմանին ահաբեկչութիւնը:
ԱՄՆ Հետամուտ Է Լիբանանի Կայունութեան Եւ Բարգաւաճումին. Ճոզեֆ Վոթել
