«ԶԱՐԹՕՆՔ», ՊԷՅՐՈՒԹ – ՀՀ վարչապետ Նիկոլ Փաշինեան Յունուար 20-ին աշխատանքային այցով կը մեկնի Զուիցերիա` Տաւոսի համաշխարհային տնտեսական համաժողովին մասնակցելու նպատակով:
Ինչպէս կը հաղորդէ «Արմէնփրես»-ը, ՀՀ կառավարութեան տեղեկատուութեան եւ հասարակայնութեան հետ կապերու վարչութենէն կը տեղեկացնեն, որ համաժողովի ծիրէն ներս կը նախատեսուին ՀՀ վարչապետի երկկողմ եւ բազմակողմ շարք մը հանդիպումներ այլ պետութիւններու ղեկավարներուն, միջազգային կազմակերպութիւններուն, առեւտրական ընկերութիւններու ներկայացուցիչներուն հետ: Տաւոսի մէջ Նիկոլ Փաշինեան կը մասնակցի նաեւ Համաշխարհային տնտեսական առաջնորդներու ոչ պաշտօնական հաւաքին (IGWEL) եւ Համաշխարհային քաղաքացիական համաժողովին:
Զուիցերիոյ Ցիւրիխ քաղաքին մէջ կը նախատեսուի ՀՀ վարչապետ Նիկոլ Փաշինեանի հանդիպումը Զուիցերիա-Հայաստան առեւտուրի պալատի ներկայացուցիչներուն եւ զուիցերացի գործարարներու հետ:
