«ԶԱՐԹՕՆՔ», ՊԷՅՐՈՒԹ –Հակառակ ամէն մեկնաբանութիւններու Արաբական ընկերատնտեսական գագաթնաժողովը գումարուեցաւ այսօր Պէյրութի մէջ, որուն ընթացքին իրենց խօսքերով հանդէս եկան արաբական երկիրներու ներկայացուցիչներ:
Ժողովի գումարման հետ կապուած Պէյրութի շատ մը փողոցներ փակ մնացին ժողովի ապահովութեան նկատառումներով: Փակ էին նաեւ Պէյրութի տարածքին գործող վարժարաններ:
Արտաքին գործոց նախարարի պաշտօնակատար Ժպրան Պասիլ գագաթնաժողովի առաջին նիստի մեկնարկին կոչ ըրաւ վերականգնելու Սուրիոյ անդամակցութիւնը Արաբական լիկային՝ կանխելու համար «պատմական սխալ մը»:
Այնուհետեւ մամլոյ ասուլիսի ժամանակ Պասիլ մասնաւորաբար դիտել տուաւ. «Ես այսօր կոչ ըրի վերընդգրկելու Սուրիոյ Հանրապետութիւնը Արաբական լիկային մէջ»: Ապա Արաբական լիկայի ընդհանուր քարտուղար Ահմետ Ապուլ Ղեյթ շեշտեց, որ արաբական պետութիւններուն միջեւ անհամաձայնութիւն կայ տակաւին այս հարցին շուրջ»:
