Հաթայի հայկական եկեղեցւոյ սպասաւոր Աւետիս Թաբաշեան, Կ.Պոլսոյ Հայոց պատրիարքարանէն հոգեւորական Թաթուլ Անոյշեան եւ աւագ քահանայ Գէորգ Չընարեան Յունուար 10-ին եւ 11-ին այցելած են Մալաթիա եւ Խարբերդ, որպէսզի այնտեղի հայութեան հետ նշեն Յիսուս Քրիստոսի Սուրբ ծննդեան տօնը: Այդ մասին, ըստ Akunq.net-ի, կը հաղորդեն թրքական լրատուամիջոցները:
Աղբիւրին համաձայն` հոգեւորականները նախ ժամանած են Խարբերդ (թրք. անուանումը` Էլազըղ): Հաթայի հայկական եկեղեցւոյ սպասաւոր Աւետիս Թաբաշեան մէկ առ մէկ այցելած է այստեղի հայերուն եւ օրհնած անոնց տուները:
Յաջորդ օրը` առաւօտեան ժամերուն, Աւետիս Թաբաշեան մեկնած է հայկական գերեզմանոց եւ աղօթած հանգուցեալներու հոգիներու խաղաղութեան համար:
Իսկ Մալաթիոյ Սուրբ Յարութիւն եկեղեցւոյ մէջ մատուցուած պատարագին մասնակցած են նաեւ Խարբերդէն ժամանած հայերը: Պատարագէն ետք տեղի ունեցած է ջրօրհնէքի արարողութիւն:
