January 15, 2019ArekyԱշխարհ, Հայաստան -Պաշտօնական այցով Արաբական Միացեալ Էմիրութիւններ գտնուող Հայաստանի Հանրապետութեան նախագահ Արմէն Սարգսեան, Ապու Տապիի մէջ, Յունուար 15-ին, հանդիպում ունեցած է Արաբական Միացեալ Էմիրութիւններու պետական նախարար Սուլթան Ալ Ճապերի հետ՝ քննարկելու տնտեսութեան տարբեր ոլորտներու մէջ համագործակցութեան հեռանկարները։
Հայաստանի Հանրապետութեան նախագահի աշխատակազմի հասարակայնութեան եւ տեղեկատւութեան միջոցներու հետ կապերու վարչութեան փոխանցած տեղեկութիւններով՝ հանրապետութեան նախագահը նշած է, որ Հայաստանը թէեւ փոքր երկիր է, բայց հայերը համաշխարհային եւ սերտօրէն փոխկապակցուած ազգ են: Եւ երբ ինք, իբրեւ նախագահ, կը խօսի համագործակցութեան մասին՝ նկատի ունի ոչ միայն Հայաստանի Հանրապետութիւնը, որովհետեւ հայերը, հայկական գործարարութիւնը աշխարհի մէջ ամէնուր են, որուն շնորհիւ համագործակցութեան ներուժը անհամեմատ կը մեծնայ։
Զրուցակիցները համաձայնած են, որ իբրեւ առաջին քայլ, ԱՄԷ-էն պատուիրակութիւն այցելէ Հայաստան՝ տեղւոյն վրայ հնարաւորութիւններուն ծանօթանալու, քննարկումներ ունենալու եւ եղած առաջարկները գործնական հիմքերու վրայ դնելու համար։
Նշենք, որ Հայաստանի Հանրապետութեան նախագահ Արմէն Սարգսեան Երկուշաբթի, Յունուար 14-ին պաշտօնական այցելութեամբ մեկնած էրԱրաբական Միացեալ Էմիրութիւններ (ԱՄԷ): Նոյն օրը, նախագահը ընդունուած էր Ապու Տապիի թագաժառանգ, ԱՄԷ-ի Զինուած ուժերու գլխաւոր հրամանատարի տեղակալ Շէյխ Մուհամմատ պըն Զայէտ ալ Նահեանի կողմէ:
