«ԶԱՐԹՕՆՔ», ՊԷՅՐՈՒԹ – Թուրքիոյ մէջ գործող ընդդիմադիր քրտամէտ «Ժողովուրդներու դեմոկրատական» կուսակցութենէն հայազգի պատգամաւոր Կարօ Փայլան խօսած է Թուրքիոյ մէջ առկայ տնտեսական խոր ճգնաժամին մասին:
Ինչպէս կը հաղորդէ «Արմէնփրես»-ը, Փայլան այս մասին գրած է թուիթըրի իր էջին վրայ:
Խօսելով տնտեսական խոր ճգնաժամին մասին՝ պատգամաւորը նշած է, որ այդ վիճակէն կարելի է դուրս գալ միայն ժողովրդավարական եւ տնտեսական հիմնաւոր փոփոխութիւններու միջոցով:
«Տնտեսական խոր ճգնաժամի մէջ ենք, գործազրկութեան մակարդակը երթալով կ’աճի, ներդրումներու ծաւալը նահանջ կ’արձանագրէ, արդիւնաբերութեան ծաւալը նուազած է 6.5 տոկոսով»,- գրած է Փայլան:
