«ԶԱՐԹՕՆՔ», ՊԷՅՐՈՒԹ – Խորհրդարանական աշխատանքին մէջ ձեւաւորուած է նոր մշակոյթ, որուն համաձայն՝ Յունուար 14-ին ՀՀ 7-րդ գումարման Ազգային ժողովի նախագահ ընտրուելէն ետք Արարատ Միրզոյեանի հետ հանդիպած է ՀՀ 6-րդ գումարման Ազգային ժողովի նախագահ Արա Պապլոյեան: Հանդիպումին խորհրդարանի նախկին ղեկավարը արդէն ԱԺ նախագահի պաշտօնը ստանձնած Արարատ Միրզոյեանին փոխանցած է օրէնսդիր մարմինի հետագայ ղեկավարումը՝ մաղթելով յաջողութիւններ: Արա Պապլոյեան կարեւորած է օրէնսդիր մարմինին մէջ նորընտիր ղեկավարի պարտականութիւններու լիարժէք իրականացումը:
Ինչպէս կը հաղորդէ «Արմէնփրես»-ը, ՀՀ ԱԺ լրատուութեան եւ հանրութեան հետ կապերու վարչութենէն կը տեղեկացնեն, որ երախտագիտութիւն յայտնելով շնորհաւորանքի եւ բարեմաղթանքներուն համար՝ ԱԺ նախագահ Արարատ Միրզոյեանը իր հերթին շնորհակալութիւն յայտնած է Արա Պապլոյեանին՝ դժուարին ժամանակահատուածի մէջ Ազգային ժողովի բնականոն գործունէութիւնը ապահովելուն համար, կարեւորած է խորհրդարանին մէջ ձեւաւորուած դրական աւանդոյթներու շարունակականութեան ապահովումը, նորերու ձեւաւորումն ու զարգացումը:
Արա Պապլոյեան խորհրդարանի ղեկավարին ծանօթացուցած է նաեւ Ազգային ժողովի նախագահի աշխատանքային պայմաններուն:
