Մեծարգոյ Նախագահ Հայաստանի Հանրապետութեան,
Յարգելի նախագահող,
Պատուարժան պատգամաւորներ եւ սիրելի ներկաներ,
Ողջունում եւ Հայրապետական Մեր օրհնութիւնն ենք բերում ձեզ Ազգային ժողովի 7-րդ գումարման անդրանիկ նիստի առիթով: Արգասաբեր գործունէութեան մաղթանքով շնորհաւորում ենք Ազգային ժողովի նորընտիր պատգամաւորներիդ:
Այսօր դուք՝ իբրեւ վստահեալ ներկայացուցիչները ժողովրդի, ստանձնում էք ձեր պարտականութիւնները: Հայաստանի նոր կեանքը կերտելու պատասխանատուութիւնը նաեւ ձեր ուսերին է, քանզի մեր երկրի առաջընթացն ու զարգացումը մեծապէս պայմանաւորուած է օրէնսդիր մարմնի գործունէութեամբ:
Մեր ժողովուրդը մեծ սպասումներ ու ակնկալութիւններ ունի բարեփոխումների: Բարօրութեան ու կարիքների հոգածութեան հրամայականը չէ միայն, որ յուզում է մեր ժողովրդին: Մեր երկրի առջեւ ծառացած են արտաքին հանգամանքներով պայմանաւորուած լրջագոյն մարտահրաւէրներ, որոնց դիմակայելու եւ շահեկան կերպով լուծումների առաջնորդելու համար ներքին կեանքում պիտի ունենանք հնարաւորինս քիչ խնդիրներ: Պետական, քաղաքական գործիչների եւ ողջ հասարակութեան ընդհանուր բարեխղճութիւնը եւ քաղաքացիական պատասխանատուութիւնը գլխաւոր պայմանն են մեր ժողովրդի ներուժի համախմբման, մեր պետականութեան ամրապնդման եւ մեր շէն, յուսալի ապագայի կերտման:
Յարգարժան պատգամաւորներ, ձեր օրէնսդրական ջանքերով պիտի ձեւաւորուեն անհրաժեշտ միջավայր ու հնարաւորութիւններ մեր երկրի տնտեսութեան շարունակական զարգացման, գիտութեան, կրթութեան, մշակոյթի առաջընթացի համար, մեր ժողովրդի անվտանգութեան եւ խաղաղութեան ապահովման համար: Ձեր հաստատած օրէնքները պիտի ծառայեն հասարակական մեր կեանքում ամրապնդելու օրինականութիւնը, արդարութիւնն ու իրաւունքը, որոնք կը զօրացնեն մեր ընթացքը՝ ապրելու եւ գործելու փոխադարձ յարգանքի, սիրոյ եւ համերաշխութեան մէջ: Սիրոյ եւ համերաշխութեան ոգով, հաւատում ենք, պիտի արդիւնաւորուեն նաեւ այս դահլիճում ընթացող քննարկումները եւ կայացուող որոշումները: Քաղաքական հայեացքների եւ տեսակէտների բազմակարծութեամբ հանդերձ՝ մեր հայրենիքի եւ ժողովրդի լուսաւոր ապագայի նոյն տեսլականն է միաւորում ձեզ՝ համախումբ ջանքերով ներդրում բերելու ազգային մեր իղձերի իրագործման նուիրական առաքելութեանը: Պատուէրն ունենք առաքեալի՝ ճշմարտութեամբ, արդարութեամբ, սրբութեամբ, առաքինութեամբ ու սիրով խորհելու (Փիլ. Դ 8), միաշունչ եւ միախորհուրդ լինելու եւ հակառակութեան ոգով չգործելու (Փիլ. Բ 2-3): Ճշմարիտ է ասուած՝ միաբանութեամբ փոքրերը մեծանում են, եւ անմիաբանութեամբ մեծերը՝ փոքրանում: Արդ, ամուր պահենք Հայաստան, Արցախ, Սփիւռք միասնականութիւնը, հաւատարմութիւնը մեր հոգեւոր եւ ազգային արժէքներին, մեր հայրերի նուիրական պատգամներին, որպէսզի ունենանք շնորհն ու զօրութիւնը կերտելու մեր հայրենիքի եւ ազգային կեանքի զարթօնքը:
Սուրբ Ծննդեան հոգենորոգ այս օրերին, արդարեւ, զօրանում են հաւատն ու վստահութիւնը, որ քրիստոնէական իր արժեհամակարգով մեր ժողովուրդը պիտի շարունակի լինել արարող ու զարգացող ազգ, հոգով ու մտքով լուսաւորուած ազգ՝ կարող բարեփոխելու իր կեանքը: Մեր Եկեղեցին, ինչպէս բազմադարեայ մեր պատմութեան ընթացքին, այսօր եւս շարունակելու է իր զօրակցութիւնը բերել հայրենի իշխանութիւնների ազգաշէն նախաձեռնութիւններին։
Մեծարգոյ պատգամաւորներ, Աստծոյ օրհնութիւնն ու շնորհներն ենք հայցում ձեզ եւ ձեր գործունէութեանը: Հայրենիքի հանդէպ ձեր սէրը թող ուղղորդի եւ ուժ ու կորով պարգեւի ձեզ: Թող Տէրը Իր Սուրբ Աջի եւ խնամքի ներքոյ պահպանի ու օրհնի մեր ժողովրդին եւ սրբազան մեր երկիրը՝ խաղաղութեան մէջ եւ բարգաւաճման ճանապարհին՝ այսօր եւ միշտ. ամէն:
