Իրանահայ յայտնի գործարար Լեւոն Ահարոնեան «Ամին օլ Զարպ» բարձրագոյն շքանշանի արժանացած է:
Յունուար 8-ին Թեհրանի «Վահդաթ» դահլիճին մէջ Հանրապետութեան նախագահի առաջին տեղակալ Էսհաղ Ջահանգիրիի ներկայութեամբ կայացած է «Ամին օլ Զարպ» բարձրագոյն շքանշանի 3-րդ շրջանի հանդիսաւոր արարողութիւնը:
«Հայերն այսօր»-ը, յղում կատարելով «Ալիք» օրաթերթին, կը յայտնէ, որ «Ամին օլ Զարպ» գործարար բարձարագոյն շքանշանի արժանացած են իրանցի 8 յայտնի գործարար, որոնց մէջ եղած է նաեւ իրանահայ ճանչցուած գործարար, Իրանի փոխադրութեան եւ տարանցիկ բեռնափոխադրման առաջատարներէն մէկուն` «Սաթի» ընկերութեան հիմնադիր եւ սեփականատէր Լեւոն Ահարոնեան:
Արարողութեան ժամանակ ելոյթով հանդէս եկած է Հանրապետութեան նախագահի առաջին տեղակալ Էսհաղ Ջահանգիրին: Ընդգծելով ներկայ պայամաններուն մէջ երկրի տնտեսութեան կենսունակութեան ապահովման համար արտահանման կարեւորութիւնը` Ջահանգիրին յատուկ անդրադարձած է այդ ասպարէզին մէջ իրանահայ գործարարներու դերակատարութեան ու մատուցած ծառայութիւններուն:
Նշենք, որ Լեւոն Ահարոնեան աշխոյժ դերակատարութիւն ունեցած է իրանահայութեան ազգային-հասարակական կեանքէն ներս: Վաստակաւոր գործարարը կը համարուի Իրան-Հայաստան առեւտրի պալատի հիմնադիրն ու երկու երկիրներու միջեւ չուերթներու հաստատման նախաձեռնողը:
