ՆՈՐ ՕՐ, ԼՈՍ ԱՆՃԵԼԸՍ.- Թեմիս Առաջնորդ Գերշ. Տ. Յովնան Արք. Տէրտէրեանի առաջարկով, Գարեգին Բ. Ամենայն Հայոց Կաթողիկոսը Ս. Սահակ-Ս. Մեսրոպ շքանշանով պարգեւատրեց իրանահայ հասարակական գործիչ, բանաստեղծ, երգիծագիր, լրագրող եւ ուսուցիչ՝ Ներսէս Բալայեան-Տէր Մեսրոպեանը, անոր հանրային գործունէութեան 70-ամեակին առիթով։
Պարգեւատրման կարգը տեղի ունեցաւ Կիրակի, Դեկտեմբեր 30-ին, Հայոց Առաջնորդարանի Ս. Ղեւոնդեանց Մայր Տաճարին մէջ, Ա. Պատարագի ընթացքին։ Հանդիսաւոր օրուայ պատարագիչն էր Արժ. Տ. Խաժակ Քհնյ. Շահբազեանը։ Վեհափառ Հայրապետի կոնդակը ընթերցեց Արժ. Տ. Մանուկ Աւագ Քհնյ. Մարգարեանը, որմէ ետք գնահատական քաջալերից խօսքեր ըսաւ Առաջնորդ Սրբազան Հայրը եւ դրուատեց օրուայ մեծարեալ Ներսէս Տէր Մեսրոպեանը, գնահատեց անոր ազգօգուտ ծառայութիւնները Իրանէն մինչեւ Միացեալ Նահանգներ, ապա շքանշանը զետեղեց յոբելեարին լամբակին։
Կրօնական արարողութենէն ետք, եկեղեցւոյ կից սրահին մէջ տեղի ունեցաւ հիւրասիրութիւն, ուր խօսք առին լրագրող-խմբագիր՝ Գաբրիէլ Մոլոյեանը, Իրանահայ Միութեան վարչական Հրանդ Յովհաննիսեանը եւ ուրիշներ։ Ապա յոբելեարը խօսք առնելով շնորհակալութիւն յայտնեց բոլոր ներկաներուն։
Թ.
