«ԶԱՐԹՕՆՔ», ՊԷՅՐՈՒԹ – ԱՄՆ-ի ամենածեր բնակչուհին՝ Լեսլի Պրաունը, Յունուար 8-ին 114 տարեկանին մահացած է Օհայոյի նահանգի Քլիվլենտ-Հայթս քաղաքը: Այդ մասին, ինչպէս կը հաղորդէ «Արմէնփրես»-ը, յայտնած է «Associated Press» գործակալութիւնը՝ վկայակոչելով անոր ընտանիքը:
Պրաունը ծնած է 1904 թուականին Ճորճիայի նահանգը: Ընդամէնը ընտանիքին մէջ եղած է 11 երեխայ: Վերջին տարիներուն կինը կ’ապրէր երեք դուստրերէն մէկուն տունը, ան նաեւ երկու որդի ունէր: Պրաունի ամուսինը մահացած է 1991 թուականին:
Ազգականները կը կարծեն, որ անոր երկարակեցութեան պատճառը կերակուրին մէջ ԱՄՆ լայն տարածում գտած գետնախնձորի օգտագործումն է, որ յայտնի է նաեւ «քաղցր գետնախնձոր» անուանումով: Պրաունը ԱՄՆ-ի ամենածեր բնակչուհին դարձած էր 2018 թուականի Մայիս 9-ին: Այդ օրը 114 տարեկան հասակին մահացած էր Տելֆին Կիպսոնը՝ Փենսիլվանիայի նահանգէն, հաղորդած է «ԹԱՍՍ»-ը:
