«ԶԱՐԹՕՆՔ», ՊԷՅՐՈՒԹ – Հանրապետութեան նախագահ Արմէն Սարգսեան աշխատանքային այցով եղած է Արարատի մարզ:
Ինչպէս կը հաղորդէ «Արմէնփրես»ը, Հայաստանի Հանրապետութեան նախագահի աշխատակազմի հասարակայնութեան եւ տեղեկատուութեան միջոցներու հետ կապերու վարչութենէն կը տեղեկացնեն, որ նախագահը մարզ այցելութիւն սկսած է Նոր Խարբերդի մանկատունէն, ուր տօնական միջոցառում կազմակերպուած էր սաներուն համար: Նախագահը զրուցած է երեխաներուն հետ, շնորհաւորած է գալիք տօներուն կապակցութեամբ՝ նշելով, թէ ուրախ է, որ նախատօնական օրը կ’անցընէ իրենց հետ: «Շատ ուրախ եմ, որ այսօր ձեզ հետ եմ: Մաղթում եմ, որ ձեր ամենամեծ հոգսը լինի ինքներդ ձեզ կատարելագործելը: Որ ամէն օր նոր բան սովորէք՝ նոր երգ, նոր ոտանաւոր: Որ իրար օգնէք, որովհետեւ դուք բոլորդ մի մեծ ընտանիք էք: Մենք բոլորս մի մեծ ընտանիք ենք: Նախագահն էլ է ձեր մեծ ընտանիքի մի մասը, քանի որ այդ մեծ ընտանիքը կոչուում է Հայաստան: Ուզում եմ, որ իմանաք, որ ես ձեր մասին շատ եմ մտածում: Ձեր պարտականութիւնն է լինել առողջ, երջանիկ, խելօք եւ ուրախ: Մեր հայրենիքում մենք ունենք ձեզնից իւրաքանչիւրի կարիքը: Ձեզնից իւրաքանչիւրը, եթէ ինքն իրեն կատարելագործի, կարող է ներդրում բերել, օգնել մեր երկրին»,– ըսած է նախագահ Սարգսեան:
Ան այնուհետեւ դիտած է սաներու տօնական ներկայացումը, ապա Ձմեռ պապի հետ երեխաներուն անձամբ յանձնած է նուէրներ: Մանկատան տնօրէն Յարութիւն Բալասանեանի ուղեկցութեամբ նախագահ Սարգսեան շրջայց կատարած է մանկատան տարածքին, եղած է վերականգնողական բաժինը, մարզասրահ, համակարգչային սենեակ, զրուցած է աշխատակիցներուն հետ, հետաքրքրուած է երեխաներուն ուսուցանուող ծրագիրներով: Համակարգչային սենեակը համալրուած է մէկ նոր համակարգիչով, զոր սաները նուէր ստացած են նախագահէն:
Նախագահ Սարգսեան այնուհետեւ այցելած է Մասիս քաղաքին մէջ գործող Հայկական Կարմիր խաչի ընկերութեան բարեգործական ճաշարան: Հայկական Կարմիր խաչի նախաձեռնութեամբ եւ Զուիցերական Կարմիր խաչի աջակցութեամբ 2017 թուականին հիմնադրուած ճաշարանին մէջ մշտապէս սնունդ կը ստանան մինակ տարեցներ եւ անապահով ընտանիքներ: Ճաշարանի գործունէութեան կ’աջակցին նաեւ տեղական ու տարածքային կառավարման մարմինները, ինչպէս նաեւ տարբեր ընկերութիւններ եւ անհատ բարերարներ:
Նախագահ Սարգսեան հանդիպած է ճաշարանի այցելուներուն, զրուցած է անոնց հետ, շնորհաւորած է գալիք տօներուն կապակցութեամբ: «Նոր տարին տօն է բոլորի համար. թէ՛ նրանց համար, ովքեր յաջողել են եւ բարեկեցիկ են ապրում, թէ՛ նրանց համար, ովքեր այս պահին դժուարութիւններ ունեն: Ես եկել եմ այստեղ ձեզ հետ ձեր հացը կիսելու, ձեզ ասելու, որ ո՛չ դուք, ո՛չ էլ այստեղ գտնուող երեխաները մոռացուած չեն: Ձեզ բոլորիդ ուզում եմ շնորհաւորել գալիք տօների առթիւ: Շնորհաւորել, յուսալ ու հաւատալ, որ մեր երկիրն աւելի լաւ է լինելու, որ բոլոր երեխաները լաւ ապագայ են ունենալու, եւ դրա համար բոլորս ձեռք ձեռքի տուած պիտի աշխատենք: Երբեք յոյսը չկորցնէք: Եկել եմ ձեզ ասելու, որ դժուար օրերից յետոյ կեանք կայ: Հաւատացէք, որ 2019 թուականն աւելի լաւն է լինելու, իսկ 2020 թուականը՝ էլ աւելի լաւը»,- ըսած է նախագահը:
Ան շնորհակալութիւն յայտնած է Հայկական Կարմիր խաչի ընկերութեան եւ անոր նախագահին՝ Մխիթար Մնացականեանին՝ բարեգործական ծրագիրի իրականացման համար եւ խոստացած է հնարաւորինս աջակցիլ կարիքաւոր ընտանիքներու երեխաներուն: Նախագահի անունով նաեւ ամանորեայ նուէրներ յանձնուած են ճաշարանի շահառուներուն:
Նախագահ Սարգսեանի յաջորդ կանգառը Սուրէնաւան համայնքն էր: Այստեղ ան այցելած է Յովսէփեաններու բազմազաւակ ընտանիքին: Ընտանիքը ունի ութ անչափահաս երեխայ, որոնցմէ աւագը 12 տարեկան է, կրտսերը՝ մէկ: Նախագահը ներկայ գտնուած է Յովսէփեաններու զաւակներէն աւագի՝ 12ամեայ Միշայի ծննդեան օրուան արարողութեան, շնորհաւորած է ընտանիքը գալիք տօներուն կապակցութեամբ: Ոչ միայն յոբելեարը, այլեւ ընտանիքի բոլոր փոքրիկները նուէրներ ստացած են նախագահէն, ընտանիքին նաեւ կենցաղային ապրանքներ յանձնուած են:
