«ԶԱՐԹՕՆՔ», ՊԷՅՐՈՒԹ – Հայաստանի Հանրապետութեան վարչապետի պաշտօնակատար Նիկոլ Փաշինեան ընդունած է զինուորական կենսաթոշակի անցնելու կապակցութեամբ զինուորական ծառայութենէն սահմանուած կարգով արձակուած նախկին խումբ մը զինծառայողներ:
Ինչպէս կը հաղորդէ «Արմէնփրես»ը, ՀՀ վարչապետի աշխատակազմի տեղեկատուութեան եւ հասարակայնութեան հետ կապերու վարչութենէն կը տեղեկացնեն, որ վերջիններս Նիկոլ Փաշինեանին ներկայացուցած են իրենց դիտարկումներն ու առաջարկները՝ կառավարութեան ընդունած որոշումին հետ կապուած, որով կը նախատեսուի պաշտպանութեան նախարարութեան յատկացնել 5 միլիառ 705 մլն դրամ՝ զինուորական ծառայութեան ընթացքին որպէս բնակարանային պայմաններու բարելաւման կարիք ունեցող հաշուարկուած, սակայն ծառայութեան ընթացքին անհատոյց բնակարան չստացած նախկին զինծառայողներուն որպէս պետական աջակցութիւն բնակարան ձեռք բերելու նպատակով տրամադրելու համար:
Կը նախատեսուի շահառուներու գրաւոր համաձայնութեան պարագային իւրաքանչիւրին տրամադրել 2 տարի մարման ժամկէտով եւ միջինը 5,000,000 դրամ արժէքով բնակարան գնելու վկայագիր:
