«ԶԱՐԹՕՆՔ», ՊԷՅՐՈՒԹ – Մինչ 2018 թուականը յարադէպ վերիվայրումներով կը մօտենայ իր աւարտին, 2019-ն, ըստ քաղաքագէտներու, կը խոստանայ աւելի լարուած ըլլալ Լիբանանի համար:
Լուրջ մարտահրաւէրներ կը սպասեն կառավարութեան, երբ վերջինս առօք-փառօք կազմաւորուի, մասնաւորաբար երկրի կայունութիւնը ապահովելու եւ ծայր աստիճան վատթար վիճակի մէջ գտնուող տնտեսութիւնը փրկելու տեսակէտէն:
Նոր տարիէն ետք Լիբանանի դիմագրաւելիք հիմնական մարտահրաւէրներէն է ՍԻՏԸՐ խորհրդաժողովին պահանջուած կառուցուածքային եւ հարկապիւտճէական բարեփոխումները՝ խթանելու օր ըստ օրէ վատթարացող տնտեսութիւնը:
Լիբանան պէտք է աշխատի նաեւ Սուրիոյ հետ խախուտ յարաբերութիւնները վերստին կայունացնելու ուղղութեամբ: Հրատապ խնդիրներու շարքին է նաեւ Լիբանանի մէջ բնակութիւն հաստատած աւելի քան մէկ միլիոն սուրիացի գաղթականներու պարագան, որ յաւելեալ բեռ կը դնէ երկրի տնտեսական անյուսալի իրավիճակին եւ փխրուն ենթակառուցուածքներուն վրայ՝ ի թիւս այլ բազմաբղէտ խնդիրներու:
Լիբանանին Բազում Մարտահրաւէրներ Կը Սպասեն 2019-ին
