Շաբաթ, 13. 07. 2024

spot_img

ԱՄԱՆՕՐԵԱՅ ՏՕՆԱԽՄԲՈՒԹԻՒՆ ՀԱՅ ԴՊՐՈՑՆԵՐՈՒ ԱՇԱԿԵՐՏՆԵՐՈՒ ՄԱՍՆԱԿՑՈՒԹԵԱՄԲ

ՆՈՐ ՕՐ, ԼՈՍ ԱՆՃԵԼԸՍ.- Ինչպէս ամէն տարի, այս տարի եւս, 7 Դեկտեմբեր 2018-ին, Սրբոց Ղեւոնդեանց Մայր Տաճարի շրջափակը լեցուն էր աւելի քան 650 ճռուողիւն թռչուններով՝ հայ մանուկներով։ Անոնք եկած էին տօնախմբելու Ամանորը եւ Քրիստոսի Ս. Ծնունդի խորհուրդով լեցուելու, ապրելու եւ ապրեցնելու։ Տօնախմբութիւնը կը հանդիսապետէր Հիւսիսային Ամերիկայի Արեւմտեան թեմի առաջնորդ՝ Գերշ. Տ. Յովնան Արք. Տէրտէրեան։ Ներկայ էր նաեւ Դամասկոսի թեմի Առաջնորդ՝ Գերշ. Տ. Արմաշ Եպս. Նալպանտեանը։ Հանդիսութիւնը տեղի ունեցաւ «Նազարէթ եւ Սիմա Գալայճեան» հանդիսասրահէն ներս։

Հոգեւորականաց դասը եւ Առաջնորդարանի պաշտօնէութիւնը սրտբացօրէն ընդունեցին եւ դիմաւորեցին աշակերտութիւնը։ Մասնակից դպրոցներն էին՝ Սահակ Մեսրոպ, Մերտինեան, ՀԲԸՄ-ի Վաչէ եւ Թամար Մանուկեան, ՀԲԸՄ-ի Մանուկեան-Տեմիրճեան,  Յովսէփեան, Փոքրիկ Հրեշտակներ, ինչպէս նաեւ հանրային վարժարաններ՝ Ճէֆըրսըն եւ Ռ. Թ. Ուայթ։

Նախքան տօնախմբութիւնը, Թեմիս Բարեխնամ Առաջնորդը ողջունեց մանուկները եւ զանոնք հրաւիրեց յոտնկայս յարգելու Սպիտակի երկրաշարժին զոհ դարձած զոհերու անմեռ յիշատակը։ Ապա, Սրբազան Հօր հետ միասին, մանուկները միաբերան աղօթք բարձրացուցին առ բարձրեալն Աստուած եւ խնդրեցին խաղաղութիւն, եղբայրասիրութիւն եւ բարօրութիւն համայն աշխարհիս համար։

Յայտագիրը ներկայացուցին Փոքրիկ Հրեշտակներ դպրոցի աշակերտները, որոնք իւրօրինակ կատարողութեամբ հանդէս եկան եւ գրաւեցին ներկաներու ուշադրութիւնը։ Անոնք թատերական կատարողութեամբ ներկայացուցին Քրիստոսի Ս. Ծննդեան պատմութիւնը եւ Ծննդեան երգերով իմաստաւորեցին օրուայ հանդիսութիւնը։ Մանուկեան-Տեմիրճեան վարժարանէն ուսանողներ իրենց նուրբ շարժումներով տօնական պարով հանդէս եկան։ Իսկ Մերտինեան, Սահակ Մեսրոպ եւ Յովսէփեան վարժարաններու աշակերտները օրուան յատուկ երգերով խանդավառեցին ներկայ մանուկները։

Ամէնէն հետաքրքրական պահը Կաղանդ Պապայի գալուստն էր։ Փոքրիկները խնդութեամբ եւ ծափողջոյններով դիմաւորեցին զինք, պարեցին եւ Կաղանդ Պապային հետ միասին ամանօրեայ երգեր երգեցին։

Փակման, շնորհաւորական եւ շնորհակալական խօսքով հանդէս եկաւ Առաջնորդ Սրբազան Հայրը։

Տօնախմբութեան աւարտին փոքրիկները հիւրասիրուեցան Սրբոց Ղեւոնդեանց Մայր Տաճարի շրջափակէն ներս։ Անոնք իրենց դպրոցները վերադարձան ուրախ եւ բարձր տրամադրութեամբ։ Նշենք, որ յաջորդ տարուան տօնախմբութեան ներկայացումը պիտի կատարեն Սահակ-Մեսրոպ վարժարանի ուսանողները։ 

Ա.Ս.Գ.

 

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին