Շաբաթ, 20. 07. 2024

spot_img

Հերոսները Մեզի Հետ, Մեր Կողքին (լուսանկարներ)

ԳՈՀԱՐ ՄՈՒՐԱԴԵԱՆ

«Զարթօնք»ի Երեւանի Աշխատակից

Դեկտեմբեր 14ին Հայաստանի ֆիզիքական կուլտուրայի եւ սփորթի պետական ինստիտուտին մէջ տեղի ունեցած միջոցառում-հանդիպումին ուսանողները ակնածալի խոնարհումով ու հպարտութեամբ կը սպասէին: ՀՀ զինուած ուժերու հրամանատար, բազկամարտի աշխարհի կրկնակի ախոյեան, ‹‹Դիւցազնագիրք››ի հերոս Սարգիս Ստեփանեանը սպասուած հիւր է ամէնուր, յատկապէս երիտասարդներուն մօտ՝ այն երիտասարդներուն, որոնք մերօրեայ պատմութեան քառուղիներուն մէջ կը փնտռեն իրենց ժամանակներու հերոսը. … ու այսօր հանդիպեցան ԱՆՈՐ:

ՀՖԿՍՊԻի ՖԴԱՏ բաժնի ֆիզիքական մշակոյթի եւ կազմախօսութեան ամպիոնի նախաձեռնած հանդիպումին, որուն ներկայ էին նաեւ զինուորական հաշմանդամներ՝ Ռոման Գէորգեանը, Արշակ Յովհաննիսեանը, Լիպարիտ Մելքոնեանը, Նարեկ Հովէեանը, ողջոյնի խօսքը արտասանեց ՀՖԿՍՊԻի նախագահ, փրոֆէսոր Վահրամ Առաքելեանը՝ նախ շնորհակալութիւն յայտնելով հայրենիքի նուիրեալներուն միջոցառումին ներկայ գտնուելու համար, նշեց, որ անոնք այն մարդոցմէ են, որ յաջողած են կերտել հայու զինուորի, հայրենքի պաշտպանի հզօր կերպար, որ մեզմէ իւրաքանչիւրին կը պարտաւորեցնէ երբեք չմոռնալ մեր հերոսական ակունքներուն մասին: Վ. Առաքելեանի խօսքով՝ հիմնարկը իր գործունէութեան տիրոյթին մէջ մշտապէս կը ձգտի մարտական գործողութիւններու ժամանակ վիրաւորում ստացած ուսանողները առնել իր հոգածութեան տակ: ‹‹Զինուոր-մարզիկները հոգածութեան ու աջակցութեան պակաս երբեք պէտք չէ զգան: Մենք ալ մեր գործով կը փորձենք փոխադարձել այն նուիրումը, զոր տղաները ցուցաբերեցին իրենց հայրենիքին ու ժողովուրդին››,- շեշտեց  Առաքելեանը:

Այնուհետեւ ԶՈՒ հրամանատար Սարգիս Ստեփանեանի առաջարկով հանդիպումը տեղի ունեցաւ հարց ու պատասխանի միջոցով:

ՀՀ ՊՆ «Մարշալ Բաղրամեան» մետալով, Հայաստանի եւ Արցախի Հանրապետութիւններու մետալներով պարգեւատրուած Սարգիս Ստեփանեանը պատմեց իր անցած ուղիին, մարզական ու ռազմական գործունէութեան մասին, ներկայացուց հերոսացման ու հայրենասիրութեան իր բանաձեւը:

Ապրող ու ապրեցնող Սարգիսը ներկաներու խնդրանքով պատմեց սահմանային մարտերուն իրեն հետ պատահած դէպքի մասին: ‹‹2014 թուականի Յուլիս ամիսն էր, սահմանին տիրող իրավիճակը բաւականին լարուած էր: Պաշտպանական շրջաններէն մէկուն մէջ հակառակորդի խափանարարական խումբը յարձակում իրականացուցած էր մեր դիրքապահ ստորաբաժանումներուն ուղղութեամբ: Թէեւ մեր ստորաբաժանումները ետ մղած էին թշնամին, բայց չէզոք գօտիին մէջ վիրաւոր զինընկեր ունէինք: Ես իմ խումբիս հետ ստացայ զինքը չէզոք գօտիէն դուրս բերելու յանձնարարութիւն: Ամէն բան շատ բարդ էր: Տարածքը ականապատուած էր, սակայն հետադարձ ճամբայ չկայ, երբ վիրաւոր ընկեր ունիս: Ռազմական խնդիրը կատարելու ժամանակ ոտքերուս տակ պայթեցաւ ականը, վիրաւորուեցայ, կորսնցուցի երկու ոտքս եւ աջ ձեռքս››- պատմեց ան:

Խօսելով զինքը չընկճած բարդութիւններու մասին՝ Սարգիսը ըսաւ՝ աննկուն հաւատքն է, որ օգնած է վերագտնելու ուժն ու տոկունութիւնը, ընտանիքն ու զաւակները ապաւէն եղած են ծանր օրերուն, անծանօթ մարդոց ուշադրութիւնն ու ջերմ վերաբերմունքը ուժ ու կեանք տուած են ամէն, ամէն վայրկեան:

Զինուորականի աչքերն ալ կը պատմեն իր ապրումներուն եւ դժուարութիւններուն մասին ու կ’ըսեն՝ թուլնալու իրաւունք չկայ:

Սարգիս Ստեփանեանի օրինակը ապրիլեան պատերազմին վերջոյթներ կորսնցուցած շատ երիտասարդներու համար ոգեշնչող ու յուսադրող է։ Թերեւս դժուարութիւններէն պահ մը ընկրկած մարտիկը բուռ մը դառնայ, բայց յետոյ կ’ըսէ՝ տես՝ ինչպէս կը քալէ… ես ալ կրնամ:

Մարմնակրթութիւնը կեանքի կարեւորագոյն ուղիներէն մէկը դարձուցած հրամանատարը պատմեց նաեւ, որ ժամանակին լուրջ, մասնագիտական կերպով զբաղած է ծանրամարտով: Վիրաւորում ստանալէ ետք, սակայն, սկսաւ կեանքի ուրիշ փուլ մը, նոր ճամբայ մը աւելցաւ, ինչը հրամանատարի մարզական կեանքը կապեց բազկամարտի հետ: Սկսան աննահանջ մարզումներ, մասնակցութիւններ տարբեր առաջնութիւններու, մինչեւ որ աշխարհի գաւաթը նուաճուած ըլլար:

Նպատակադրուելով շարունակել յաջողութիւններ ու յաղթանակներ գրանցել մարմնակրթութեան մէջ՝ բազկամարտի աշխարհի կրկնակի ախոյեանը վերջերս հիմնած է ՀՀ հաշմանդամային մարմնակրթութեան ֆետերասիոն, ուր կամաւորութեան սկզբունքով ամէն ինչ պիտի կատարուի զարգացնելու հաշմանդամային մարմնակրթութիւնը՝ չառանձնացնելով որեւէ մարզաձեւ:

Հանդիպումի աւարտին հրամանատար Ստեփանեանը ներկաներուն, մասնաւորապէս երիտասարդներուն մաղթեց լաւ ու պիտանի մարդ ըլլալ, ներդրում ունենալ հայրենիքի բարօրութեան, չտրտնջալ դժուարութիւններէն, ըլլալ հոգիով ուժեղ: Վստահ  է, որ որեւէ խոչընդոտ կարելի է յաղթահարել:

 

Լուսանկարները՝ Լիլիթ Մկրտչեանի

 

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին