«ԶԱՐԹՕՆՔ», ՊԷՅՐՈՒԹ –Նախագահ Միշէլ Աունի՝ կառավարութեան կազմաւորման մէջ առկայ փակուղին վերացնելու միտուած նախաձեռնութիւնը, որ է՝ նախարարական պաշտօն մը զիջիլ իր բաժնեմասէն, ներկայացուեցաւ սիւննի հըզպալլայամէտ երեսփոխաններուն եւ վարչապետի պաշտօնակատար Սաատ Հարիրիին:
Նախագահի նախաձեռնութիւնը՝ բաղկացած է հինգ կէտերէ.
Աուն նախարարական պաշտօն մը պիտի զիջի իր բաժնեմասէն սիւննի հըզպալլայամէտ երեսփոխաններուն, Հարիրիի հաւանութիւն պիտի տայ Աունի առաջարկին, սիւննի երեսփոխաններու համաձայնութիւնը իրենց խմբաւորումէն դուրս նախարարի անուն մը ներկայացնելու, Հարիրիի եւ սիւննի երեսփոխաններուն միջեւ հանդիպում Պաապտայի պալատին մէջ, Հարիրիի կողմէ սիւննի երեսփոխաններու ներկայացուցչութեան ընդունումը նոր կառավարութեան մէջ եւ Աունի հետ համատեղ հըզպալլայամէտ երեսփոխաններու առաջադրած անուններէն մէկը ընտրելու որոշումի կայացումը:
